Impi Iqembu Lekhilikithi Labantu Besifazane LaseNyuvesi yaKwaZulu-Natali.I-UKZN Iseka Ingqophamlando Yokuthula Iqembu Lekhilikithi Labesifazane Abayizimpumputhe
Click here for English version
Ikhempu yokuqeqeshwa yokuqala yeQembu laKwaZulu-Natali Labantu Besifazane Abayizimpumputhe likhombise igxathu elimqoka lezimidlalo ezifaka bonke abantu eNingizimu Afrika ebise-Kingsmead Stadium eThekwini.
Lo mkhankaso wokuqala, obuhlelwe yiKwaZulu-Natal Association of Blind Cricket (KZABC), ubuhlanganise abantu besifazane besifundazwe sonke ekhempeni yokuqeqesha yokuqala yeQembu LaseKZN Lekhilikithi Labantu Besifazane.
Umuntu obeneqhaza elikhulu empumelelweni yekhempu bekunguDkt Khumbuzile Khumalo, ofundisa abenza i-Bachelor of Exercise and Leisure Sciences eKolishi LeSayensi YezeMpilo eNyuvesi yaKwaZulu-Natali. UKhumalo oyimenenja yeqembu ubeneqhaza elikhulu ekuqeqesheni, ekuhlaziyeni indlela yokudlala kweqembu, izinhlelo nokugqugquzela iqembu kulolu hlelo lwezinsuku ezintathu.
Kule khempu kubekhona izingxoxo ngokuthuthukisa amakhono, imidlalo, ukuqeqesha abaholi nokuqinisa amathimba, zesekwa ngabadlali nabaqeqeshi beqembu lesizwe lezimpumputhe. Lolu hlelo lubeyisisekelo sezinhlelo zangomuso zeqembu emiqhudelwaneni yezifundazwe, okubalwa kuyona umdlalo neNtshonalanga Kapa ngasekupheleni kwalo nyaka.
UKhumalo uthe le khempu ikhombisa amangwevu amakhulu aleli qembu. “Ithalente elikhonjiswe lapha liyisimanga, ikakhulu kwikhempu yokuqala. Laba bantu besifazane bami ngomumo ukuqhudelana. Ngifisa ukuthi bathole ukuxhaswa nokwesekwa abakudingayo ukuze baqhubeke kulolu hambo,” kusho uKhumalo.
Iqhaza le-UKZN aliphelelanga ekuphatheni iqembu kuphela njengoba abafundi abenza izifundo zeSayensi Yezemidlalo oNks Nokwethemba Mwelase noNks Nosihle Buthelezi, nomfundi owenza i-Onazi uNks Amahle Mhlongo, bekorile futhi balekelela ngezinhlelo zokulungiselela umdlalo.
Iqhaza labo likhombise ukuzibophezela kweNyuvesi emphakathini, ekuthuthukiseni ezemidlalo zabantu abakhubazekile nokufaka abantu besifazane kwezemidlalo.
Ukwenziwa ngempumelelo kwale khempu kukhombisa igxathu eliya phambili kwikhilikithi yabantu besifazane abayizimpumputhe nezemidlalo zabantu besifazane KwaZulu-Natali futhi zigcizelele iqhaza le-UKZN ekusimamiseni amathuba afaka wonke umuntu kwezemidlao nethalente labo bonke abantu.
Amagama: wuNombuso Dlamini
Isithombe: Sithunyelwe