Isifundiswa Sifinyelele Ezingeni Eliphezulu Emsebenzini Waso

BY: .

Click here for English version

IDini neNhloko yeSikole seSayensi yezeMpilo uSolwazi Khathutshelo Percy Mashige ikhushulelwe ekubeni ngusolwazi ogcwele, into enkulu kwezemfundo ephakeme.

UMashige, ongungoti we-ophthomestri, uneminyaka eyevile kwengama-20 ekufundiseni iziqu zokuqala neziphezulu namava amaningi ekushicileleni amaphepha ocwaningo.

UMashige, owazalelwa eLimpopo, waqeqeshelwa ukuba wungoti wezitho zomzimba e-University of Witwatersrand kwathi emva kwalokho waqeqeshelwa ukuba wungoti we-ophthometri e-University of Durban-Westville. Unamaphepha amaningi ocwaningo awabhalile nge-ophthomethri, isayensi yezifo nezempilo yomphakathi kanti ucwaningo lwakhe luke lwasetshenziswa ezinhlelweni nasezinqubweni KwaZulu-Natali.

UMashige, ongusosayensi obhaliswe e-NRF nomsizi womhleli webhuku lamaphepha ocwaningo elihlonishwayo i-BMC Ophthalmology, useBhodini Labeluleki lebhuku lamaphepha ocwaningo i-South African Health Review.

UMashige useke waphatha izikhundla ezihlukene ezinhlanganweni zalapha ezweni nezaphesheya kanti manje ungomunye wabahloli be-School of Optometry and Vision Science eMasinde Muliro University of Science and Technology (eMMUST) eKenya lapho ebambe iqhaza khona ekwenzeni izifundo zeMasitazi neZobudokotela.

UMashige uyisikhulu esiphezulu se-African Vision Research Institute; Usihlalo we-Education, Training and Registration Committee ye-Professional Board for Optometry and Dispensing Opticians; Usihlalo we-African Eye Institute; Usihlalo we-Global Institute for Entrepreneurship and Ethics noSihlalo we-Community Self Mastery Coaching Institute. Ungomunye wabasunguli be-African Translational Research Group ne-Centre for Eye Care and Public Health Intervention Initiative, okuyizigcawu zabacwaningi base-Afrika emhlabeni jikelele ukuthi bandise ukubambisana ngocwaningo lwezempilo. 

Emiklomelweni aseke wayithola kukhona i-Impact Acceleration Award of the UK ye-Economic and Social Research Council, i-South African Netherlands Partnership on Alternatives in Development Award ne-South African Medical Research Council National Health Scholarship Award.

Ungumcwaningi i-Developing Research Innovation Leadership and Innovation Fellow kanti useke wahlabana nge-South African Optometric Association Award for Outstanding Contribution to Optometry.

UMashige useke wabhekana nezinselelo ezinzima empilweni, enkulu okwaba yingozi yemoto eyamkhubaza umgogodla kepha uyaqhubeka nokwenza izinto ezinkulu emsebenzini wakhe nokukhuthaza abanye ethimbeni lakhe labaholi ezifundweni. Waziwa kakhulu ngokuba ngumuntu wabantu namakhono akhe okuba ngumholi osebenzela umphakathi.

‘Ukuba ngusolwazi ngokugcwele yigxathu elimqoka nokufinyelela esicongweni kusona sonke isifundiswa. Nakuba indlela inameva kodwa ukuba ngusolwazi ogcwele kuvulelana inqwaba yamathuba. Kimina ukuba ngusolwazi ophelele akusho impumelelo yami ngedwa kodwa futhi kusho ukuvulela abanye abantu amathuba,’ kusho uMashige.

Umnewabo kaMashige uSolwazi Mashudu Churchill Mashige, uthe: ‘Ngishaywa wuvalo uma ngicabanga izinto ezike zehlela umfowethu kepha waqhubeka nokudlondlobala njalo’

Amagama: wu-Maryann Francis

Isithombe: Sithunyelwe