Usosayensi one-A1 rating uSolwazi Steve Johnson.I-A1 NRF Rating Kusosayensi Wase-UKZN
Click here for English version
USolwazi wase-KZN u-Steve Johnson uklonyeliswe yi-National Research Foundation (i-NRF) nge-A1 rating.
Lesiyisigaba esiphezulu kunazo zonke i-NRF ezinika ‘abacwaningi abahlonishwa ngabalingani babo ngokuvumelana njengezifundiswa ezisezingeni eliphezulu emhlabeni wonke emkhakheni wazo nezineqhaza elikhulu (elifaka neminye imikhakha) ngokomsebenzi wabo wocwaningo.’
U-Johnson ungusolwazi e-School of Life Sciences ophikweni oluseMgungundlovu noMqondisi e-UKZN Centre for Functional Biodiversity. Uyi-South African Research Chair (SARCHI) in Evolutionary Biology.
Ucwaningo luka-Johnson luhlose ukuqonda i-ekholoji yokulumbana kwezitshalo. Uchazwa yiqhaza lezinto ezinamakhemikhali ezihwamuka kalula ebudlelwaneni bezitshalo nezilwane kanti usungule usukasihambe wegumbi lokucwaninga ngezimpawu zamakhemikhali ezifakelwe ukuheha iziqholi zezitshalo.
Unezinga i-Google Scholar h-index engama-73 kanti useshicilele amaphepha ocwaningo acutshungulwe ngabalingani bakhe angaphezu kwama-300 nezincwadi ezine. Useke wasebenza njengeSekela loMhleli emabhukwini ocwaningo amahlanu asezingeni lomhlaba jikelele.
‘I-School of Life Sciences siyaziqhenya kakhulu ngokuba nomcwaningi ovelele ngaloluhlobo ethimbeni lethu,’ kusho iDini yeNhloko yeSikole uSolwazi Ade Olanarin. ‘Iqhaza ahlale enalo eSikoleni, ikakhulukazi ekucijeni abantu namakhono, ngokwemisebenzi exhaswa yi-NRF ngabalingani abaxhumene ne-Centre for Functional Biodiversity iyabongeka kakhulu. U-Steve simfisela impumelelo emsebenzini wakhe njengoba eqhubeka nokusikhuthaza nokusigqugquzela sonke.’
IDini yeZocwaningo e-College of Agriculture, Engineering and Science, uSolwazi Neil Koorbanally, uvumelane no-Olanarin, wathi: ‘Steve, siyaziqhenya ngawe eKolishi. Uyisibonelo esihle kubacwaningi abancane.’
‘Ukufinyelela ezingeni i-A-rating yinto abacwaningi nezifundiswa ezingi ezifinyelela kuyona kanzima,’ kusho iPhini SekelaShansela laseKolishi, uSolwazi Albert Modi. ‘Uhlelo lwe-NRF rating luhamba phambili enhlosweni ye-NRF ekutheni umkhakha wezesayensi waseNingizimu Afrika ubesezingeni lomhlaba eNingizimu Afrika. Yisikali esimqoka sokukala izinga labacwaningi bethu uma ubaqhathanisa nabavelele baphesheya kwezilwandle. Ukuba nabeluleki ekucwaningeni abakulelizinga kuzocija isizukulwane sangomuso sabacwaningi.
‘Steve siyakuhalalisela ngalempumelelo enkulu kangaka! Usebenze ngokuzikhandla nethimba elihle kanti kukufanele lokukuklonyeliswa nokuhlonishwa.’
Amagama: ngu-Sally Frost
Isithombe: Sithunyelwe