Kuphindwe kwabungazwa i-Olympiad yoMfundi We-Data Science wase-UKZN

BY: .

Click here for English version

Umfundi wonyaka wesibili kuData Science uMnu Aaron Naidu wengeze omunye umklomelo phezu koxhaxha lweminye ngemva kokuphuma phambili ngokuhlanganyela nabanye abathathu kwi-South African Tertiary Mathematics Olympiad (i-SATMO) – obekungokwesibili ewina lomqhudelwano, njengoba ukuyinqoba okokuqala kwenzeka esesesikoleni samabangu aphezulu!

Lomqhudelwano obukwingosi yokuxhumana ngobuchwepheshe besimanje unyaka wesibili, udinga ukuthi abafundi bakhombise ikhono labo lokuxazulula izinkinga ngokuphendula imibuzo engama-20 emahoreni amabili, bakhombise ukujula ngokucabanga nobuciko ezinkingeni ezisuke zibekiwe.

U-Naidu, owaphuma isibili kwi-SATMO yezi-2020, kulonyaka ubambene noMnu Ralph McDougall wase-Stellenbosch University noMnu u-Tim Schlesinger wase-University of Cape Town endaweni yokuqala.

U-Naidu uthi akabe wumpetha wama-Olympiad, njengoba wayengumfundi ovelele kwi-South African Mathematics Olympiad (i-SAMO) kathathu kulandelana, waphuma kwabahlanu abavelele kulandelana. Ngonyaka wezi-2019 wathola indondo yesiliva kwi-Computer Programming and Physics Olympiads yaseNingizimu Afrika, wathola indondo yethusi kwi-International Mathematics Olympiad. Ngowezi-2020, waba ngomunye wabantu ababili baseNingizimu Afrika abathola I-International Olympiad in Informatics.

Lomfundi owabaqwaqwada bonke emakhanda KwaZulu-Natal, waphuma isibili ezweni ngowezi-2019, waqala ukuba nobudlelwano ne-UKZN ngaphambi kokubhalisela ukuba ngumfundi khona, njengoba ayelandela iphupho lokuba ngumpetha wama-Olympiad ngaphansi kweso likaSolwazi Poobhalan Pillay kwi-Siyanqoba Regional Olympiad Training Programme iminyaka eyisithupha.

Ukubamba iqhaza kuma-Olympiads akumkhathazi uNaidu, njengoba engumuntu othanda ukuqhudelana sidalo futhi uyakuthanda ukuveza amakhono akhe.

‘Yonke imibuzo emihle yama-Olympiad inendawana yobuhle ezimpendulweni zayo, okwenza ama-Olympiads abemnandi kunezivivinyo ezijwayele ukubhalwa,’ kusho yena.

Amava akhe kuma-Olympiad amhlomisile ezifundweni zakhe njengoba egxile ekuqondeni nasekusebenziseni ulwazi kunokuvele agxishe izindlela zokuxazulula izinkinga ekhanda. 

‘Ukuba nomqondo onjena ngenkathi ufunda kusiza kakhulu ukuzijwayeza ukuqonda izinto ozifundayo uze ukwazi ukuphendula izimpendulo zama-Olympiad kube wukuziphuzela nje,’ kusho yena.

Lomfundi wakudala wase-Eden College uyazifela ngezibalo kanti ufisa ukusebenzisa izifundo zakhe ukwenza umsebenzi ohlanganisa izibalo, i-informatics ne-data science. Ukhethe ukufunda e-UKZN ukuze abeseduze nomndeni wakhe ozwanayo eThekwini nangenxa yegama elihle lezifundo zeNyuvesi ku-data science.

‘Okwamanje ngiyazithakasela izifundo zami. Sengifunde izinto eziningi ezintsha nezimnandi kanti nginesasasa ngezifundo zami lapha,’ kusho u-Naidu.

U-Naidu ongumdlali we-chess ukwazile ukuqhubeka nokuyidlala kwi-inthanethi ngenkathi kudlange ubhubhane, nokho ukhumbule ukudlala ibhola lomphebezo wetafula, nawo awuthakaselayo.

Amagama: ngu-Christine Cuénod

Isithombe: Sithunyelwe