Izifundiswa Zezomthetho Zibhale Isahluko Enqolobaneni Evelele Yezomthetho YaseNingizimu Afrika

BY: .

Click here for English version

Izifundiswa zeSikole Sezomthetho e-UKZN seziphinde zazibonakalisa ukuba bangabanye babantu abahamba phambili kwezomthetho eNingizimu Afrika.

USolwazi Donrich Thaldar, uMnu Bonginkosi Shozi, uDkt Marietjie Botes, no-Dkt Beverley Townsend babhale isahluko enqolobaneni ehlonishwayo yezomthetho eNingizimu Afrika i-Law of South Africa (i-LAWSA) esibizwa nge-Human Biological Material.

Oshicilelweni lwesithathu lwe-LAWSA, Volume 26(1), lesisahluko sithinta izinto eziningi ezimqoka njengobunikazi bamasampula asetshenziswa ocwaningweni, imithetho emqoka yokukhiqiza ngobuchwepheshe nemithetho ethinta i-biobanking. Ukucacisa umkhakha wemithetho elawulayo, lenqolobane yenza kube lula ukuqonda izitatimende zomthetho ezizosetshenziswa ngabameli, izifundiswa, abafundi, ongoti bezokwelapha nososayensi.

I-LAWSA isizakhele igama lokuba ngumqulu ohlonishwayo nomqoka oyinqolobane yolwazi kwezomthetho eNingizimu Afrika kanti kuyona sekuke kwabhala ongoti abahamba phambili kwezomthetho abafana noSolwazi David McQuoid-Mason, Warren Freedman no-Michael Kidd. Manje ezinyatheIweni zabo kulandela u-Thaldar nabalingani bakhe abhale nabo, bonke be-Health Law and Ethics Research Interest Group yeSikole soMthetho asebegcwalise igama labo njengabacwaningi abavelele emkhakheni wezomthetho.

UShozi, ofundela izifundo zobudokotela uqophe umlando wokuba ngumbhali omncane kunabo bonke emlandweni weminyaka engama-40 yasungulwa i-LAWSA. Uphawule wathi: ‘I-LAWSA iyinqolobane emqoka emkhakheni wezomthetho eNingizimu Afrika. Umuntu uqala kuyona ukubheka uma kukhona afisa ukukwazi komthetho ngesihloko esithile. Ngangike ngiyisebenzise ngisengumfundi. Ukuba ngumbhali we-LAWSA kuthathwa njengento engandele bani kodwa yababaliweyo emikhakheni yabo kanti ngiyajabula ukunikwa ithuba elinjena ngisemusha emsebenzini wami wokuba ngumcwaningi.’

Lesi sahluko kwi-LAWSA sitholakala ngokungena lapha.

Amagama: nguLungile Ngubelanga

Isithombe: Sithunyelwe