Uthisha Wezifo Zengqondo Uklonyeliswe Nge-Atlantic Fellowship for Equity in Brain Health

BY: .

Click here for English version

Uthisha Wezifo Zengqondo eSikoleni Sezokwelapha uDkt Khanyo Ngcobo uklonyeliswe nge-Atlantic Fellowship for Equity in Brain Health.

Izifundo ze-Atlantic Fellows zitholakala e-Global Brain Health Institute (e-GBHI) e-Trinity College Dublin, e-University of Dublin, e-Ireland ngokuhlanganyela ne-University of California e-San Francisco (e-UCSF), eMelika.

I-GBHI iphokophela ukunciphisa ukudlanga kwesifo sokukhohlwa ebantwini abadala kulelizwe nasemhlabeni jikelele ngokuqeqesha nokweseka isizukulwane sabaholi abasha ukuthi baqhamuke nezindlela ezintsha zocwaningo kwinqubo nasemsebenzini wokwelapha.

Leli thuba lokuyokwenza ucwaningo phesheya linikwa abantu abazinikele ekushintsheni ingqondo emkhakheni wezempilo nabakwazi ukusiza imiphakathi entulayo.

‘Ngiyabonga ngokuqokwa njengomunye wabayokwenza ucwaningo phesheya bangonyaka wezi-2021-22. Ngokolwazi lwami ekusebenzeni ngezempilo yengqondo, izinto ezithinta isifo sokukhohlwa uma usumdala zivame ukuholela ekutheni abantu baphuze ukufuna usizo, izinhlelo zokuhlolela lesisifo ebantwini bakithi nezinhlelo zokusiza abanalesisifo,’ kusho uNgcobo

‘Lelithuba lokuyokwenza ucwaningo phesheya kusho ukuthi ngizokwazi ukwenza imisebenzi nemikhankaso yokuqhakambisa ezempilo yengqondo ngokungihlomisa ngolwazi engizobuyela nalo ezweni lakithi uma sengiqede ucwaningo phesheya. Ngijabule kakhulu ngalelithuba.’

Njengomuntu oyokwenza ucwaningo phesheya uNgcobo uzothola amathuba ayingqayizivele okufunda e-Trinity College Institute of Neuroscience, iSikole seZifundongqondo neSikole seZobudokotela, izibhedlela ezingabalingani be-Trinity nesikhungo i-Institute for Successful Ageing sase-Mercer nezinye izikhungo eziningi ezingabalingani emikhakheni ehlukene nasezindaweni ezihlukene enyuvesi nase-Ireland.

Ukuthola ulwazi kulemithombo yongoti kuzomsiza afeze umbono wakhe wokuthi kubhekwana kanjani nokugwema isifo sokukhohlwa ebantwini abadala emhlabeni wonke. Lokhu kuqeqeshwa kuzokapakela emazwekazini ehlukene njengoba i-GBHI isebenzisana ne-UCSF nezinye izifundo ze-Atlantic Fellows emhlabeni jikelele.

UDkt Ngcobo uya e-Trinity College Dublin ekupheleni kwalonyaka.

INhloko yoMnyango we-Psychiatry uSolwazi Bonga Chiliza ithe: ‘Siyambonga uKhanyo ngodumo alulethe eNyuvesi YaKwaZulu-Natal ngempumelelo yakhe nangokuba yisibonelo. Simfisela okuhle kodwa ohambweni lwakhe. Halala ngalomklomelo ohlonishwayo emhlabeni nomfanele.’

UDkt Ngcobo ongudokotela wezifo zenqondo osebenza e-King Dinuzulu Hospital eThekwini, uneziqu zobudokotela i-MBChB zaseSikoleni Sobudokotela e-UKZN ngonyaka wezi-2010, wathweswa i-CMSA Fellowship in Psychiatry ngowezi-2019. Wathola iMastazi (i-MMed-Pyschiatry) e-UKZN ngonyaka wezi-2020.

Unentshisekelo enkulu yocwaningo kanti kumanje wenza imikhankaso eminingi ngesifo sabantu abadala sokukhohlwa, okukhona ukuhlolela isifo sabantu abadala sokukhohlwa nezindlela zosizo. Ukhona ezintweni ezithinta ezempilo zengqondo nokufundisa ngesifo sabantu abadala sokukhohlwa nokunakekela nokweseka amakhasimende nonompilo.

Amagama: nguLihle Sosibo

Isithombe: Sithunyelwe