USolwazi Vannie Naidoo.Kudingidwe Impilo Yabasebenzi Abafundisayo Ngesikhathi Se-COVID-19
Click here for English version
Ngemva komsebenzi wakhe oncomekayo wokusebenza nomphakathi, uSolwazi Vannie Naidoo waseSikoleni seZokuphatha, Ezobuchwepheshe NezokuBusa umenywe nguuMqondisi we-CECUE uSolwazi Saad Znad Darwish wase-Kingdom University e-Bahrain ukuthi aphathe iwebhina ebizwa nge-Academic Staff Wellness During COVID-19.
Kwiwebhina uSolwazi Naidoo uthe indaba yempilo yabantu abafundisayo imqoka kakhulu kubaholi baseNyuvesi ngenxa yomphumela we-COVID-19 ezifundisweni emhlabeni jikelele. ‘Abaholi baseNyuvesi kudingeka ukuthi babhukule ukweseka abasebenzi abafundisi ababhekane nezinselelo nezingqinamba ngokomoya ngesikhathi sobhubhane. Ukwenza izinto ngendlela entsha kuphoqe abasebenzi ukuthi bahlalele ovalweni nangokukhathazeka ngenkathi bebona abantu ababathandayo, imindeni yabo, abalingani babo, izitshudeni nabangani babo behamba noma betheleleka.’
Uthe ukuphila ngokwesaba ngenxa ‘yokungazi ukuthi uzogula nini’ noma ‘uzosinda yini obhubhaneni kuholele ekutheni abantu abafundisayo babe nexhala nokukhathazeka okungalawuleki okubadalele izinkinga ezinkulu ngokwempilo. Ezinkingeni nasezintweni ezihluphe abasebenzi kukhona ukukhathala, ixhala, ukushaywa wuvalo, ukuba nenhliziyo encane nezinhlobo ezihlukene zokhwantalala.’
USolwazi Naidoo uthe abaphathi beNyuvesi nabaholi abayizifundiswa kufanele baqinisekise lokhu okungezansi ukunakekela impilo yabasebenzi:
• Izinqubo ezintsha zokuya ekhefini
• Ukucijwa ngokomphefumulo, ngokomsebenzi nangokwempilo
• Ongoti abayizazingqondo nabeluleki abatholakala ngokushaya ucingo ukweseka abasebenzi baseNyuvesi
• Izikhulumi ezikhuthazanayo ezikhuluma ngezinto ezithinta impilo
• Ukufunda kwabasebenzi ezinkundleni zokuxhumana
• Ukugqugquzela ukwazi ngezenhlanzeko, ezempilo nezokuphepha ngesikhathi sobhubhane
* USolwazi Naidoo uyilungu eligcwele loMkhakha WezokuPhatha neZomthetho e-UKZN. Ekufundiseni ugxile ekuphatheni, amaqhinga ezinkampani, ezamabhizinisi, izindlela zokucwaninga nezokukhangisa.
Amagama: wuLungile Ngubelanga
Isithombe: Sithunyelwe