IDini Yezobudokotela Ihlonishwe nge-Maria Duran Medal Yangowezi-2020

BY: .

Click here for English version

USolwazi uNcoza Dlova, iDini neNhloko yeSikole Sezokwelapha, uklonyeliswe nge-Maria Duran Medal yangowezi-2020.

Lomklomelo ohlonishwayo emhlabeni unikwa abantu besifazane abangabaholi abavelele kwezesikhumba abakhombise amagalelo anzulu ekwelapheni izifo sezikhumba zabantu besifazane nezingane. Lomklomelo ngowokuhlonipha u-Maria M Duran, owayenguNobhala-Jikelele nePhini likaMengameli Elikhulu le-International Society of Dermatology.

Ngonyaka wezi-2019, uSolwazi uDlova nozakwabo babona isicubu esiyimbangela enkulu yempandla ebantwini besifazane abamnyama. Wabambisana nososayensi baseMelika nabakwa-Izrayeli ukucwaninga ngomnyombo we-Central Centrifugal Cicatricial Alopecia (i-CCCA), enye yezimbangela ezinkulu ezidala ingxibongo ebantwini besifazane abamnyama. Uyisishabasheki sokuthi abantu ababe nesikhumba nezinwele kwemvelo kanti wacwaninga kabanzi ngokusetshenziswa kukakhilimu ngendlela engafanele ebantwini besifazane bomdabu nabamaNdiya eNingizimu Afrika. Ungumuntu wesifazane wokuqala ukuthi abe yinhloko yeSikole Sezokwelapha nomunye wabesifazane abamnyama abambalwa abangongoti besikhumba eNingizimu Afrika. Ucwaningo lwakhe lugxile esikhunjeni nasezinweleni kwabomdabu, izifo zesikhumba nesandulela-ngculazi nesikhumba. Usebhale amaphepha ocwaningo abuyekezwe ozakwabo evile kuma-86, wabhala izincwadi ezintathu ngesikhumba, wabhala izahluko ezevile eshumini ezincwadini ezinkulu zokufundisa ngesikhumba.

Useke wamenywa ukuthi abe yisikhulumi esiqavile emazweni evile kwangama-30, wavakasha ukuyofundisa e-Havard nasezikhungweni zemfundo ephakeme e-Brussels, e-Afrika nakwamanye amazwe.

USolwazi uDlova useke wachazwa njengesibonelo somholi ovelele noyisibonelo esihle kubalingani bakhe. Enye yezindondo aseke wayithola phakathi kweziningi eyokuba yidini evele i-Best Dean Leader in the College of Health Sciences ngonyaka wezi-2019. Unozwelo nokuphokophela futhi unothando lokusebenzela umphakathi. Wenze umsebenzi omningi ukulwa nokucwaswa kwabantu abanebali elimhlophe. USolwazi uDlova ubambe iqhaza kwezempilo nokufundisa abantu ngezinkinga zesikhumba kanjalo nokusungula imikhankaso yabantu abaqothukelwa yizinwele neyokulwa nemithi eshisa isikhumba. Unetshisekelo yokufundisa intsha engabaholi emkhakheni wezesikhumba nakweminye imikhakha kanjalo nezindaba ezithinta uguquko olufaka abantu abamnyama nokungashiywa ngaphandle kwabo kwezemfundo.

UDkt uVangee Handog, uMengameli we-International Society of Dermatology, uchaze uSolwazi uDlova njengomunye wabantu abahlonishwayo emhlabeni kwezesikhumba, umuntu okhathalele abanye, umholi weqiniso nomngani othandekayo ofanelwe yindondo i-Maria Duran Medal.

Amagama: Lihle Sosibo

Isithombe: Sithunyelwe