Abafundi Bakamatikuletsheni Abavelele Baqoke Ikolishi Lezifundo Zomthetho NeZokuphatha

BY: .

Click here for English version

Abafundi abavelele kumatikuletsheni ngonyaka wezi-2020 KwaZulu-Natali uNks Jetaria Moodley, uNks Zen Olivier, uMnuz Kiash Baldeo, uMnu Keshav Govender, uMnuz Kganya Molefe noMnuz u-Akhil Harrydhasret bakhethe ukufunda eKolishi Lezifundo Zomthetho Nezokuphatha lase-UKZN.

Nakuba bebhekane nenselelo yokufunda ngesikhathi sobhubhane I-COVID-19, lababafundi abavelel - bonke abaphase ngamalengiso ezifundweni eziqala kweziyisithupha kuya kweziyisishiyagalombili - bathi akubanga nzima ukuqoka ukuzofunda e-UKZN.

UNks Moodley owenza i-Bachelor of Commerce in Accounting (ngamalengiso ayisithupha), u-Harrydhasret (ayisikhombisa) noMolefe (ayisikhombisa) bathi into ebenze bakhetha iNyuvesi yigama layo nendawo yayo uma iqhathaniswa namanye amanyuvesi nokuthi izifundo zayo zokucwaninga amabhuku ziphasiswe yi-South African Institute of Chartered Accountants.

‘Isinqumo sami sokuzofundela i-Bachelor of Commerce in Accounting e-UKZN kungenxa yothando lwami lomkhakha wezinto ezithinta ezamabhizinisi nezezimali nothando lokusebenza ngezinombolo,’ kusho u-Moodley.

Kwengeza yena: ‘I-UKZN ibiseqhulwini kimina ngenxa yendawo yayo negama layo lokukhiqiza ama-chartered accountant avelele emhlabeni.’

UMolefe uthe ngemuva kokuyeka isikole ngenxa yezinkinga zasekhaya, kodwa ngenkathi esebuyela esikoleni ngonyaka wezi-2019, wayezimisele ukusebenza ngokuzikhandla nokuphasa ngamalengiso.

‘Ngikhula ngangingeyona ingane ehlakaniphile noma eyisidabulane kodwa ngangangifisi ukuthi lokho kungivimbe ngoba ngikholwa ngukuthi ukusebenza ngokuzikhandla kunezithelo. Yingakho ngikwazi ukuphumelela ezifundweni eziyisikhombisa ngamalengiso nakuba bekunobhubhane,’ kusho yena.

‘Ngizimisele ukufunda okuningi kubafundisi bami ngangamandla enginawo kanti ngikholwa wukuthi i-UKZN izongibeka ethubeni lokufeza iphupho lami lokuba yi-chartered accountant,’ kwengeza uMolefe.

U-Harrydhasret uthe ukhuthazwe wumlando wenyuvesi negama layo nokuthi ikhiqize abantu abaningi abaphumelelayo.

‘Ngifisa ukusebenza kanzima ngonyaka wami wokuqala, ukuze ngithole umfandaze ngonyaka wesibili okuzosiza abazali bami ngalesisikhathi sobunzima be-COVID-19. Ngifisa ukuba yi-chartered accountant evelele bese ngiba wumqondisi wenkampani yami. Ngifisa ukuphosa esivivaneni sokufukula umphakathi ukuqinisekisa izingane ezintulayo zangakithi zinamathuba angcono kunalawo engawathola mina,’ kusho u-Harrydhasret.

U-Olivier (ophase ngamalengiso ayisikhombisa), nothathwe kwi-Bachelor of Law, uthe ukhethe i-UKZN ngoba yisikhungo esihlonishwayo nesiseduze kwasekhaya.

‘Kulolu hambo ngifisa ukuvuleka amehlo, ngazane nabantu abasha abavela ezindaweni ezehlukene. Ngifisa ukuqhubeka ngifunde, ngigcine ngithole iziqu zobudokotela kwezomthetho,’ kusho yena.

U-Baldeo (ophase ngamalengiso izifundo eziyisishiyagalombili) no-Govender (ophase ngamalengiso izifundo eziyisikhombisa), bobabili abenza i-Bachelor of Business Science, bathi into ebenze bakhetha i-UKZN wuthando lwabo lwezamabhizinisi nolwezimali nesifiso sokuphosa esivivaneni sokuthuthukisa umnotho waseNingizimu Afrika.

‘Leziziqu ziqukethe izifundo eziningi engangizithakasela esikoleni njengezibalo, i-Financial Mathematics ne-Statistics. Ngikholwa wukuthi ulwazi olunzulu lezomnotho nezezimali luyisisekelo sekusasa lomuntu,’ kusho u-Baldeo.

‘Ngifisa ukufunda kabanzi ngomkhakha wezezimali, ngithuthukise ulwazi lwami lwezamabhizinisi,’ kusho u-Govender.

Zonke izitshudeni zibonge abazali bazo, izihlobo, othisha nabeluleki bazo ababeneqhaza elimqoka, babeseka, ikakhulukazi ngesikhathi sobhubhane, lapho okwadingeka ukuthi bejwayele ukufunda ezinkundleni zokufunda ngobuchwepheshe besimanje.

Amagama: nguLungile Ngubelanga

Izithombe: Zithunyelwe