Isitshudeni sezeMfundo, uNks Phakamile Mazibuko, ubeye kwi-Commonwealth Futures Workshop.Umfundi Weziqu ZeMastazi KwezeMfundo Ubeye Kwi-Commonwealth Futures Workshop
Click here for English version
Umfundi weziqu zeMastazi kwezeMfundo, uNks Phakamile Mazibuko, usanda kuya kwi-Commonwealth Futures Workshop yase-Durban University of Technology ngokubambisana ne-Association of Commonwealth Universities, i-Commonwealth Secretariat, ne-British Council.
Isihloko salo mhlangano wokucobelelana ngolwazi besithi: Re-imagining Peace.
Lolu chungechunge lwemihlangano yokucobelelana ngolwazi lwezenzelwe ukuqhakambisa iqhaza labaholi abayintsha ekufafazeni ukuqondana ngokwezinhlanga ngokubekezelelana, ubuqotho, inhlonipho, nokuqonda izindawo zokuhlala ezihlukene ezimweni ezehlukene.
Lo mhlangano wokucobelelana ngolwazi ube yingosi yabaholi abangabafundi emazweni e-Commonwealth yokuthi babheke izindlela zokusabalalisa ukuthula nokuxazulula izinkinga ngokuthula ezindaweni ezehlukene ukubhekana nezinselelo zomhlaba ezinjengokungalingani nokuhlukumezwa kwabantu besifazane.
UMazibuko, ongomunye wezitshudeni zase-UKZN ezingama-40 ezivelele, uthe le ngosi imfundise iqhaza lobuholi nemfundo ekudaleni imiphakathi enokuthula nebumbene.
‘Ukubuka ukuthula kabusha ngokuhlanganyela ngeso elibanzi nezixukuza ugebhezi kwenze ngabona izindlela esesajwayezwa zona nokuthi sesesaba izinselelo,’ kusho yena. ‘Ukucobelelana ngolwazi nabantu abaqhamuka ezindaweni ezihlukene kugcizelele ukuthi kumqoka kangakanani ukuqonda ukuhlukana ngokwamasiko ngenhlonipho, ukubekezelelana nokulingana ezimweni zethu ezehlukene. Izikhungo zemfundo ephakeme nabaholi banomsebenzi wokuqhamuka nezindlela zokuqinisekisa izindawo ezinokuthula nezingenalo udlame emanyuvesi, ezindaweni zokuhlala, nasemphakathini wonkana.’
UMazibuko, owaphumelela ngamalengiso, phecelezi i-summa cum laude, ukholwa ukuthi izingosi ezinje zimqoka ekuqinisekiseni ukuthi abaholi abayintsha baqonda ukwehlukana ngamasiko, ubulili namandla nangezimfundiso ezimweni ezihlukene zenhlalo. ‘Uma siqondisisa futhi sihlonipha ukwehlukana, ukubambisana kungenzeka ngokuqhamuka nezindlela ezintsha nezisebenzayo ezigxile ekubhekaneni nokungalingani nodlame emiphakathini yakithi,’ kwengeza yena.
UMazibuko uhlela ukusebenzisana nabantu base-UKZN ukuqhamuka nezixazululo zokugqugquzela ukuthi kube nezindawo ezingenalo udlame emabgcekeni eNyuvesi, emiphakathini nangaphandle.
Amagana: ngu-Melissa Mungroo
Isithombe: Sithunyelwe