Isifundiswa sezemfundo, uSolwazi Claudia Mitchell.Isifundiswa SezeMfundo Siklonyeliswe nge-Léon-Gérin Prize
Click here for English version
USolwazi Claudia Mitchell waseSikoleni sezeMfundo e-UKZN usanda kuklonyeliswa nge-Léon-Gérin Prize ngenxa yegalelo lakhe ekucwaningeni kwisayensi yakwa-humanities neyezenhlalo yabantu.
U-Mitchell uhlonishwa kakhulu ngomsebenzi wakhe kwezokunqanda ukuhlukumeza ngokobulili, ukwazisa ngesandulelangculazi nengculazi nakwezentsha emhlabeni jikelele.
Wathola indondo emcimbini owawuhlelwe wuHulumeni wase-Quebec e-Canada. ‘Wumklomelo omkhulu lona kanti ngiyabonga e-UKZN, i-McGill University nabanye abaxhasi ngosizo lwabo oluvamile locwaningo lwami,’ kusho yena.
Umsebenzi wocwaningo omningi ka-Mitchell ugxile ezindabeni eziningi ezithinta intsha – okubalwa kuzona izifundo ngamantombazane, ezocansi nezesandulela-ngculazi, indluzula yezobulili nobunjalo bothisha. Ocwaningweni lwakhe kukhona izindlela zokufundisa ezibonakalayo njengamavidiyo kamakhalekhukhwini nezithombe, ukuxoxisana nabantu abasha ngezihloko ezehlukene, okukhona kuzona ukusabalala kwesandulela-ngculazi nokunukubeza ngokocansi.
Njengomsunguli we-Participatory Cultures Club, uyaqhubeka nokusebenzisana nabantu besifazane abasebasha e-Ethiopia, eKenya, eNingizimu Afrika, eMozambique, eVietnam nase-Russia kanjalo namantombazane omdabu nabantu besifazane e-Canada yonke.
Kwelakubo e-Quebec, umsebenzi wakhe ugxile ekucijeni othisha abasha nabacwaningi emkhakheni wezidingo zezingane ezisezingozini e-Montreal, okubalwa kuzona izingane ezikhanyezwe yimpi nezingenabuzwe.
Amagama: ngu-Melissa Mungroo
Isithombe: Sithunyelwe