Izifundiswa Zase-UKZN Ziqophe Ividiyo Ngexhala Labasebenzi Bezempilo Elidalwa Yi-COVID-19

BY: .

Click here for English version

Ividiyo ehlose ukubheka ixhala elihambisana ne-COVID-19 iwumphumela wokubambisana phakathi komNyango weSayikholoji, ungoti wezemfundo ne-Centre for Rural Health (i-CRH).

Lo msebenzi wevidiyo oyizigaba ezine ucelwe nguSolwazi Inge Petersen, wenziwa ngamathimba e-Mental Health Integration Programme (i-MhINT) ne-Southern African Research Consortium for Mental health INTegration (S-MhINT), kuhola i-CRH, ukubhekana nexhala abasebenzi bezempilo abangabhekana nalo nezindlela zokumelana nenkinga ukubasiza.

Yenziwe ngokwesicelo soMnyango wezeMpilo ukweseka uhlelo lokuhlola isimo sengqondo yabasebenzi abasekhaleni lempi, iziguli namalungu omphakathi, kanjalo nezimenenja zezempilo ngokohlelo lwazo lwe-Mental Health and Psychosocial (i-MHPSS) ekubhekaneni nobhubhane i-COVID-19 eKZN. Uhlaka lwendaba lwenziwe ngokuhlanganyela noMnyango wezeMpilo nethimba elididiyele izinhlaka eziningi okubalwa kuzona izifundiswa, ongoti bezengqondo, abacwaningi nongoti wezemfundo yabantu abadala.

Isidingo sokuqinisa kwezekweseka kwezengqondo emiphakathini nakubasebenzi bezempilo ngokuthinta i-COVID-19 kubonwa yiningi. Ucwaningo luveze ukuthi abasebenzi bezempilo banezinto ezibakhathazayo, okuholela ezinkingeni zengqondo.

‘Ukhwantalala nexhala okuhambisana ne-COVID-19 okuphatha abasebenzi bezempilo kweyeme ekukhathazekeni ukwesaba ukutheleleka; ukwesabela impilo yemindeni yabo; ukushoda kwezimpahla zokuzivikela nokuzizwa bengakulungele ukwelapha iziguli ezine-COVID-19 nakuba kunezinqubo namasu okwelapha nawokwenza asahlanganiswa nasazodluliselwa kubasebenzi abasekhaleni lokwelapha,’ kusho isifundiswa sase-UKZN uDkt u-Ruwayda Petrus. ‘Kunokudideka ngokuthi bazokwazi yini ukubhekana nobhubhane uma seludlangile njengoba kuzodingeka banakekele isibalo esikhulu seziguli ngesibalo esilinganayo sabasebenzi, nako okuzobanga olunye ukhwantalala.’

Njengoba ividiyo yokuqala ibithinta indaba yexhala nokhwantalala oluthinta umvalelwandlini kuwona wonke amazinga omphakathi, eyesibili izogxila ekuxazululeni izinkinga zabasebenzi bezempilo ababhekene ne-COVID-19. Ividiyo yesithathu neyesine asenziwa. Enye iqondene nabasebenzi bezempilo, ithinte indaba yobuholi, kuthi enye iqondiswe kumalungu omphakathi futhi ithinte umunyu nokushonelwa.

Ividiyo ingabukwa ku: https://youtu.be/_xUXcZXgrDg.

Amagama: ngu-Melissa Mungroo

Isithombe: Sithunyelwe