Ungoti Kwezabasebenzi Wase-UKZN Uqokelwe Esigungwini Somhlaba Sabahleli

BY: .

Click here for English version

Ungoti kwezabasebenzi uSolwazi u-Shaun Ruggunan uqokelwe ukuba sesigungwini sabahleli be-Equality, Diversity and Inclusion: An International Journal (i-EDI).

I-EDI Journal ishicilelwa yi-Emerald Group Publishing kanti iyisithangami sokuthi kudingidwe izinto ezithinta amathuba alinganayo ngokobulili, ngakwamazinga, ngokobuzwe, ngokokukhubazeka, ngokweminyaka, ngokokuthandana ngokobulili, ngokwenkolo nangezinye izindlela zokungalingani emphakathini.

U-Ruggunan uqokwe nguSolwazi u-Christina Stamper wase-Western Michigan University, eMelika, ngenxa yamava akhe kwezabasebenzi. Kumanje usezigungwini zabahleli be-Organization – a SAGE Journal ne-Retail and Marketing Review. Wake waba sezigungwini zabahleli be-South African Review of Sociology ne-Professions and Professionalization.

Ukukhethwa kuka-Ruggunan kuwuphawu lokuthi izifundiswa zase-UKZN zifunwa ubuthaphuthaphu futhi ziyahlonishwa emhlabeni. Umsebenzi wakhe omkhulu kuzoba wukuvikela isithunzi sebhuku lamaphepha ocwaningo, abuyekeze amaphepha ocwaningo okungenani amane ngonyaka, abe yinxusa lebhuku lamaphepha ocwaningo, andise izindawo lapho lifinyelela khona. 

Ephawula ngokuqokwa kuka-Ruggunan, uSolwazi u-Stephen Mutula, i-Dean nenHloko yesiKole sezokuPhatha, ezobuChwepheshe nezokuLawula, uthe: ‘Ukuqokwa kukaSolwazi u-Ruggunan kuwubufakazi besibopho besiKole sokuqhakambisa amagalelo okucwaninga kwizifundiswa zomhlaba. IsiKole sizibophezele emigomweni yokulingana, ukungefani nokufaka zonke izinhlobo zabantu ezinjongweni zebhuku locwaningo. Le migomo iyisisekelo sokuphatha kahle ezemfundo nangokwenza. Kuyancomeka ukubona izifundiswa ezinjengoSolwazi u-Ruggunan ziphakanyiselwa ukumela isiKole neNyuvesi ezingeni lomhlaba.’ 

U-Ruggunan ukubheke ngamehlo abomvu ukusebenza nezifundiswa ezivelele zakuwona wonke umhlaba kanti uthe: ‘Njengomfundisi wezakwandabazabantu wase-UKZN naseNingizimu Afrika, kunezinto ezehlukile namava engiza nako okuzosimamisa izinjongo nomsebenzi webhuku locwaningo ukuthi kufinyelele ebantwini abaningi.’ Wengeze ngokuthi ibhuku locwaningo lifisa ukuthi lifake wonke umuntu kanti enye yezindlela zokwenza loku wukwandisa ubulungu besigungu ngokwendawo nangokwehluka kwabantu abakusona.

Uyaziqhenya ngokusebenzela leli bhuku locwaningo elihambisana nezinto zocwaningo azithandayo. ‘Leli bhuku locwaningo lihambisana nendlela engibuka izinto ngayo yokuthi ezakwandabazabantu azigcini nje ngokuba yinhlangano umuntu ayisebenzelayo kodwa futhi zisho umphakathi inhlangano umphakahti okuyona.’

I-EDI iyibhuku locwaningo elidlondlobalayo njengoba sekwande isibalo samaphepha ocwaningo athunyelwayo kanti izinga lokwamukelwa kwamaphepha linyukile kusukela ngonyaka wezi-16 kuya kowezi-2018. Selike layelela ukubhekwa kwezindaba zekhethelo ezithinta indaba yenhlangano njenge#BlackLivesMatter, u-Trump ne-EDI, ukuHlukunyezwa ngokoCansi ne-#MeToo movements, ukulwa nobandluluo nobandlululo lwabelungu.

Amagama: ngu-Hazel Langa

Isithombe: Sithunyelwe