Abebemele i-ISA nabakwa-Corporate Relations.Abafundi Baphesheya Bathakasele Ukuba Se-Afrika
Click here for English version
Abamele i-International Student Office for International Students Association (i-ISA) eNyuvesi YaKwaZulu-Natal (e-UKZN) bebenekhempu yezinsuku ezintathu.
Le khempu ibise-St Lucia kanti uhlelo lwayo belunemidlalo yangaphakathi, igunya elingandele bani lokungena emKhosini womHlanga KwaNongoma, ukuntweza ngesikebhe, uhambo ngemoto esiqiwini nokufundiswa ngamasiko ase-Afrika.
UMengameli we-ISA ekhempasini yase-Howard uMnu Tamasang Tangie Willy uthe: ‘Ukuhlanganisa amalungu ehlukene e-International Student Association kule khempu kwenze ukuthi siqonde kangcono amasiko ethu. Ngicabanga ukuthi izinto esizibhungile ekhempini zizosenza sibe nezigcawu zokuhlanganyela ndawonye, ikakhulu izitshudeni zase-Afrika, zenze izinto zibe lula kuwo wonke umuntu njengoba ziningi izinselelo izitshudeni zakwamanye amazwe ezibhekene nazo.’
Ohlelweni bekukhona izinto zokuqeda amahloni nesigcawu sobuholi esidingide izinselelo abafundi ababhekene nazo nokuthi bangabhekana nazo kanjani ngobuholi obuphusile nokuba nobuntu.
UMnu Feruzi Ngwamba waseSikoleni Sezifundo NgeNhlalo Yomphakathi ekhempasini yase-Pitermaritzburg wethule isigaba i-Governance and Organisational Development, esichaze ngezinhlelo nemithetho yombutho. ‘Size kule khempu yobuholi ukuzofundisa izitshudeni zakwamanye amazwe ukuthi baqonde kangcono ukuthi isebenza kanjani iNyuvesi, nemithetho nemibandela elawula ubudlelwano phakathi kwezinhlangano zezitshudeni neNyuvesi,’ kusho uMnu Ngwamba ‘Loku kumqoka kakhulu ngoba abafundi abaningi bakwamanye amazwe e-UKZN bayazibona ukuthi abangenile khaxa egiyeni lasenyuvesi ngokuzizwa besekhaya nokuba yingxenye yabo bonke abantu enyuvesi,’ kusho yena.
Ithakaselwe ikhempu, abamele izitshudeni babonge ithuba lokwazana nelokucobelelana ngolwazi.
Amagama: nguSinethemba Khumalo
Isithombe: nguSethu Dlamini