I-UKZN Yemukele Akade Befundela Ubudokotela E-Cuba

BY: .

Click here for English version

Izitshudeni ebezifundela ubudokotela ezili-126 ekade ziqeqeshwa iminyaka emihlanu e-Cuba zemukelwe "ekhaya" e-University of KwaZulu-Natal (e-UKZN).

I-College of Health Sciences (i-CHS) yenze "umcimbi wokwemukela ekhaya" izitshudeni eziphothule i-Nelson Mandela-Fidel Castro Cuban Collaboration Programme (i-NMFCCP) esezibuyile ukuzoqeqeshwa izinyanga ezili-18 ezibhedlela zaKwaZulu-Natali.

IPhini LeSekelashansela neNhloko ye-CHS, uSolwazi Busisiwe Ncama, lemukele ngezandla ezifudumele lezi zitshudeni emndenini wase-UKZN, lathi: ‘Siyaniqinisekisa zitshudeni zethu ukuthi i-UKZN izohamba nani kulolu hambo lwezinyanga ezili-18 lwasezibhedlela zaseKZN.’

I-NMFCCP iyingxenye yesivumelwano samazwe amabili okuyiNingizumu Afrika ne-Cuba nesasayinwa ngoMengameli abangasekho u-Nelson Mandela no-Fidel Castro, ngenhloso yokuqeda ukusweleka kodokotela eNingizimu Afrika.

Izitshudeni zizoshintshisana emaqoqweni okuhlinza, ezifo zabantu besifazane, ezangaphakathi, ezabantwana, ukugula okujwayelekile, nezifo zezengqondo. Zizoqeqeshwa ezibhedlela zokuqeqesha ezivunywe yi-HPCSA zaseKZN okukhona kuzo i-Addington, i-General Justice Gizenga Mpanga, i-RK Khan, i-Prince Mshiyeni, i-King Edward VIII, i-Queen Nandi, iNgwelezane, i-Port Shepstone, i-Newcastle, i-King Dinuzulu, i-Estcourt, i-St Apollinaris, iNkandla, ne-Wentworth.

UDkt Gustavo Lopez, odabuka e-Cuba noyimenenja yezokwelapha e-General Justice Gizenga Mpanga Hospital eNyakatho yaseKZN, uthe kwizitshudeni: ‘Uhlelo lezokwelapha lwase-Cuba lugxile ekunqandeni izifo ezijwayelekile emphakathini kanti uhlelo lwaseNingizimu Afrika lugxile ekwelapheni izifo esezivele zikhona. Nibuye eNingizimu Afrika nolwazi oluningi lwendlela yokwelapha egxile ekunqandeni izifo ezivamile kanti nisendaweni enhle yokushintsha inqubo yokwelapha ekhona.’

I-Dean yase-School of Clinical Medicine, uSolwazi Ncoza Dlova, ikhuthaze izitshudeni ukuthi zisebenze ngokuzikhandla, ziphokophele empumelelweni. ‘Akuyi ngokuthi umjaho uwuqale kanjani kodwa kuya ngokuthi uwuqeda kanjani kanti yimiqondo yenu ezocacisa ukuthi niyanqoba noma cha,’ kusho yena. UDlova uqinisekise izitshudeni ngokuthi umNyango wakhe uzozeseka ngokugcwele, ikakhulu amathwasa obuholi kwezokwelapha angama-36 azoseka, acathulise lezi zitshudeni. Amathwasa obuholi kwezokwelapha ngabafundi abacijwa yi-Dean kwezobuholi.

Izitshudeni zikhuthazwe ukuthi zilwele amalungelo eziguli, ziqinisekise ukuthi zilwela ubulungiswa emphakathini ngale komsebenzi wobudokotela. InHloko ye-Family Medicine, uDkt Bernhard Gaede, ithe: ‘Kudingeka nisifundise ukuthi ezempilo zingaguqulwa kanjani zibe ngcono eNingizimu Afrika. Inselelo yezifo idlangile KwaZulu-Natali kanti asikayinqobi singabelaphi. Kuyaphithizela ezindaweni ezemukela iziguli. Kudingeka sifunde ukuthi siwuvala kanjani lo mpompi. Lokhu singakwenza uma sifundisana, sihambisana kulolu hambo.’

Umkhandlu wabafundi bezobudokotela, i-Medical Campus Representative Council, ebimelwe wuMnu Kenneth Sithole, nayo yemukele lezi zitshudeni yethembisa ukuzeseka. ‘Siyaziqhenya ngempumelelo yenu. Kuzo zonke izinselelo ebenibhekene nazo, nikwazile ukuphumelela. Namuhla niloba ikhasi lokuqala lencwadi yezinyanga ezili-18. Niqinisekise ukuthi nibhala incwadi emnandi.’

Omele izitshudeni, uMnu Nhlanhla Khuzwayo, wakhuliswa wubabekazi wakhe, wafundiswa ngabashadikazi baseNgilandi basesontweni labo emakhaya kwaNongoma, enyakatho yaseKZN. UKhuzwayo uthe kade afisa ukuba wudokotela kanti wajabula kakhulu ngomfundaze we-NMFCCP wokuyofunda e-Cuba.

Kulabo akade bekhona uthe: ‘Empilweni kuhlale kunezinselelo kodwa kudingeka ukuthi umuntu ahlale ethemba. Ngiwumphumela wobudlelwano bekhethelo boMengameli abangasekho, u-Nelson Mandela no-Fidel Castro, abenza ukuthi lolu hlelo lube khona. Silapha ukuzoshintsha izinto kanti sijabule ukufika emndenini wase-UKZN.’

Amagama: ngu-MaryAnn Francis