Unikezwe Isikhundla Sokuba yiMenenja uDokotela Wezilwane Omncane

BY: .

Click here for English version

UDkt Nqobile Jaca useyiMenenja entsha ye-Biomedical Research Unit (i-BRU) e-School of Laboratory Medicine and Medical Sciences.

I-BRU ingenye yamagumbi amakhulu okwenza ucwaningo ngezilwane e-Afrika eseNingizimu. Ingasenyakatho-ntshonalanga ophikweni lwase-Westville, kanti iyizitezi ezintathu ezingama-square metre ayizi-7 000. Le ndawo yenzelwa ukuzalanisa nokugcina izilwane ezinhlobonhlobo okucwaningwa ngazo. Inhloso yayo wukuhlangabezana nezidingo zezesayensi zothisha nabacwaningi emkhakheni wesayensi yezinto zezemvelo ezitholakala ohlangothini lolwandle oluseMpumalanga yeNingizimu Afrika.

UJaca unamangwevu amakhulu, njengoba ake waba wudokotela wezilwane kaHulumeni emNyangweni wezoLimu e-Ermelo, waphinde waba wudokotela wezinyoni wase-Ceva Animal Health, enye yezinkampani ezihamba phambili ekukhiqizeni amakhambi.

Wetheswa iziqu i-Bachelor of Veterinary Science e-University of Pretoria ngonyaka wezi-2015. Phakathi kwezinhloso zakhe ezinkulu kubalwa ukwenza i-BRU ikwazi ukuheha ongoti balo mkhakha abasebancane nokuqala izifundo zokupopola izifo, okuyosiza lesi sikhungo sibe nemali yaso. UJaca ufisa ukuqala uhlelo lwezifundo zegumbi lokucwaninga lezesayensi, okuzosiza ukuthi isikhungo saziwe kulo mkhakha neminye.

Lo dokotela wezilwane oneminyaka engama-30 nowazalelwa eThekwini kuyamthokozisa ukubuyela ekhaya abe seduze nomndeni wakhe.

Amagama: wuLihle Sosibo

Isithombe: Sithunyelwe