Kwethulwe uhlelo lwe-Durban International Film Festival

BY: .

Click here for English version

Uhlelo lwe-Durban International Film Festival (i-DIFF) yama-40, lwethulwe kwabezindaba e-Centre for Creative Arts (CCA) yase-College of Humanities, yase-UKZN, e-Maharani Hotel.

Le festiveli yenzelwa ezindaweni ezehlukene zasedolobheni namaphethelo kusukela ngomhla we-18 kuya kumhla wama-28 kuNtulikazi ngaphansi kwendikimba ethi: Uniting Africa through Film.

I-DIFF izovulwa yi-Knuckle City evutshelwe wumqondisi waseNingizimu Afrika, uMnu Jahmil X.T. Qubeka. Le filimu ibheka isimo somqondo womshayisibhakela waseMdantsane, eyilokishi laseNingizimu Afrika elinomlando wokukhiqiza ompetha besibhakela bomhlaba. IngesiXhosa kanti ibheka indaba yokwazisa ubudoda ngokwedlulele nezinto ezenzeka emakhosombeni lapho kuliwa khona.

UQubeka uthe: ‘Ngisondelene kabi nale festiveli. Ngiyizwa ngaphakathi. Kuyintokozo kimi ukuphinde ngibe nefilimu eqokelwe ukuvula. Ngikubheke ngamehlo abomvu ukuba kwi-DIFF.’

UDkt Lliane Loots, owumqondisi obambile e-CCA, uchaze ifestiveli njengomgubho wamafilimu weminyaka engama-40. ‘Ukufinyelela kule ngqophamlando yefestiveli yamafilimu yaseNingizimu Afrika, nase-Afrika imbala, kuyimpumelelo yabo bonke abenzi bamafilimu asebake bakhombisa umsebenzi wabo kule nkundla nawo wonke umsebenzi wokwenza amafilimu nabo bonke abantu ngamunye asebake bathamela le midlalo. Njengoba i-DIFF igubha indawo yayo e-Afrika nasemhlabeni, sijabulile ukuba yinkundla yokuthi abantu abanganakiwe kulendima babeke ilaka labo,’ kusho yena.

U-Loots uqhube wathi i-DIFF iyaqhubeka nokukhangisa ngamafilimu abantu besifazane, wazibophezela emkhankasweni ka-“50/50 ngowezi-2020” ovunywe kumafestiveli amaningi emhlabeni. Le festiveli izibophezele ‘ekufinyeleleni kumaphesenti angama-50 kulo nyaka kuzo zonke izinhlelo, okuyisibalo esifisa ukufinyelela kuso bese siphinde sisiphucula kumafestiveli alandelayo,’ kusho yena.

Isiphethu - Emerging Filmmakers Hub- ibambisene ne-Andrew Mellon Foundation ne-KwaZulu-Natal Film Commission- izoba nesithangami sokucijana sokuqala sokubhala amafilimu ngesiZulu.

Kukhethwe amaqophamlando ayishumi azoqhudelana emkhakheni wamaqophamlando avelele i-Best Documentary ne-Best South African Documentary. Onqobile uyoba sethubeni lokuqokelwa kwi-Academy Award.

IMenenja ye-DIFF, uNks Chipo Zhou, ithe: ‘Sijabule kakhulu ngohlobo lwamafilimu emcintiswaneni wamaqophamlando kulo nyaka. Sinemingenelo yamaqophamlando engama-950 ethinta izindikimba nezihloko eziningi ezehlukene. Uhlu lwakulo nyaka lugxile ohambweni lwabantu ngamunye, iningi lalo ligxile entsheni ebhekene nezinselelo ezahlukene, okubalwa kuzo indaba yobulili, eyobuhlanga neyesiko. Sikubheke ngamehlo abomvu ukubona la mafilimu nezethameli kwi-DIFF nezinto ezixukuza ugebhezi kulabo abenza amafilimu abazobe bekhona.’

I-12^th Talents Durban, ibambisene ne-Berlinale Talents (i-Berlin International Film Festival) inika ithuba abenzi bamafilimu abali-18 lokuthi baye ohlelweni lwezinsuku ezinhlanu zokucijwa.

Izincwajana zohlelo nazo zonke izikhathi zokuvezwa kwamafilimu zizotholakala mahhala ezindaweni zamafilimu nezinye izindawo zokusabalalisa ulwazi.

Ngeminye imininingwane, vakashela ku-http://ccadiff.ukzn.ac.za/ noma yiliphi ikhasi lezinkundla zokuxhumana ze-DIFF.

Amagama: ngu-Melissa Mungroo

Izithombe: Zithunyelwe