Isifundiswa Sezesintu Siqokelwe Kwesobunxusa kwelase-Seychelles

BY: .

Click here for English version

USolwazi Abul Fadl Mohseen Ebrahim weSikolo Sezenkolo, Ezobunzululwazi neZasemandulo e-UKZN uhlonishwe ngesikhundla senxusa lase-Seychelles, eqokwa wuMengameli wakhona, uMnu Danny Faure.

Yinto enkulu ku-Ebrahim ukusebenzela izwe lakubo.

Ngo-2016 ngemva kokushicilela incwadi ethi: Muslims in Seychelles: An Historical Appraisal of their Legacies, uKhomishana oMkhulu wase-Seychelles ePitoli, uNks Marie-Antoinette Rose Quatre, wathinta u-Ebrahim emnxusa ukuba athathe isikhundla sokuba iNxusa lase-Seychelles, okuyinto ayivumela phezulu.

Kweminye imisebenzi yakhe kukhona ukugqugquzela ezokuvakasha, ezohwebo, nezemfundo phakathi kwe-Seychelles neNingizimu Afrika.

U-Ebrahim, osegunyaziwe ngokusemthethweni wuMengameli Cyril Ramaphosa noMnyango wezaMazwe nokuBambisana, usevele unikiwe isigqebhezana esimnika izimendlela nezithelo zamagunya okwenza lo msebenzi.

‘Ngenkathi ngihlangana noSekelashansela wase-University of Seychelles, uthe sizobambisana ngokuqala uhlelo lokushintshana ngabafundi phakathi kwamaNyuvesi ethu nethuba lokuqala uhlelo lwezifundo zenkolo e-University of Seychelles,’ kusho u-Ebrahim. ‘Ngihlose ukucela i-UKZN ukuthi ibhalise abafundi base-Seycheles emikhakheni yezifundo zobudokotela nezobuhlengikazi.’

U-Ebrahim wazalelwa e-Seychelles, kwathi ngowe-1970, ngemva kokuqeda izifundo ze-GCE ‘O’ Level, wabhalisa e-Aleemiyah Institute of Islamic Studies ePakistani lapho athweswa khona iziqu i-Bachelor of Arts in Islamic Studies ngowe-1975, wase elandelisa ngeziqu i-Bachelor of Theology zase-Al-Azhar University eGibhithe ngowe-1977.

Wathola i-mastazi ngowe-1983 neziqu zobudokotela ngowe-1986 e-Temple University e-Philadelphia, eMelika.

U-Ebrahim waqala ukufundisa eNyuvesi i-Durban-Westville (manje esiyi-UKZN) ngowe-1985, efundisa izifundo ze-Islamic Studies.

Wathatha umhlalaphansi ngowezi-2011, wahlonishwa ngokuba wusolwazi eSikoleni seZenkolo, Ezobunzululwazi neZasemandulo e-UKZN lapho esaqhubeka nokucija abafundi abenza iziqu ze-onazi, eze-mastazi, nezobu-dokotela kulo mkhakha.

Miningi imibhalo aseyishicilele ngoBusulumane nezinto ezithinta ezemvelo nezokwelapha, wethula izinkulumo emazweni amaningi.

Amagama: ngu-Melissa Mungroo

Isithombe: Sithunyelwe