Umhlangano Wokuxoxa Ngendlela Iziguli Ezinesifo Sofuba Esingalapheki Ngemithi Ejwayelekile Ezibuka Ngayo Ukubhema

BY: .

Click here for English version

Umhlangano mayelana nezindlela, ulwazi nezinkolelo zeziguli ezinesifo sofuba i-Drug Resistant Tuberculosis (DR-TB) ezibuka ngayo ukubheka wethulwe onguthisha kwezeNtuthuko YoMphakathi eSikoleni SeziFundokuhlelwa Komumo Wezakhiwo Nentuthuko uDkt Zifikile Phindile Shangase.

Lo mhlangano bewubanjelwe esibhedlela i-King Dinizulu Hospital eThekwini ukuze kubikelwe ababambe iqhaza ngokutholakele emininingweni eqoqwe ngesifundo sikaShangase seziqu ze-PhD.

Isihloko: Ukuhlonzwa Kwezihibe Ezivimbela Ukuyeka Ukubhema Ezigulini Ezinesifo Sofuba Esingalapheki Ngemithi Ejwayelekile (DR-TB) KwaZulu-Natali, eNingizimu Afrika: Uhlelo Lokungenelela.

Ocwaningweni lwakhe, uShangase ubehlola ulwazi, imibono kanye nezinkolelo zabanesifo sofuba esingalapheki ngemithi ejwayelekile ngokubhema, ukusabalala kwezihibe ezivimbela ukuyeka ukubhema kwalabo ababhemayo abanalesisifo sofuba futhi kube kubhekwa ulwaizi, imibono, inkolelo nezindlelakwenza zabasebenzi basezibhedlela mayelana nokubhema.

Izihibe eziphathelene nokuba yisigqila sokubhema zihlanganise umlando wokubhema, ukulangazelela ugwayi, ukubhema njengengxenye yokwenza nsukuzonke kanye nokuhluleka ukuyeka ukubhema. Izihibe ezingaphathelelene nokubhema zihlanganise ukuntuleka kolwazi lwezindlela zokuyeka ukubhema, ingcindezi yengqondo, ungangabi nothando lokuyeka ukubhema nokududana nontanga. 

Izihibe eziphathelene nezinhlaka zihlanganisa ukuntuleka kwezinhlelo zokufundisa ngezempilo , ezikaqedisizungu esibhedlela okuholela ekubeni nesikhathi esiningi sokungenzi lutho, ukuntuleka kwezinhlelo zokuyeka ukubhema nokutholakala kukagwayi emagcekeni esibhedlela. ‘Iziguli zizwakalise ukuba nesifiso sokuyeka ukubhema futhi zadlulisa nokukhathazeka kwazo ngokuntuleka kwezindlela zokuzeseka ukuze ziyeke,’ kusho uShangase.

Ngocwaningo lakhe usethuthukise uhlelo lokuyeka ukubhema oluhambelana nesiko leziguli ezinesifo sofuba esingalapheki ngemithi ejwayelekile (DR-TB). Lolu hlelo lubheke indlela yokwakha izindawo ezinokweseka, ukwakha izinqubomgomo zezempilo yomphakathi ezifanele, ukuhlela kabusha ukuhlinzekwa kwezempilo, ukuthuthukisa amakhono okusebenzisana nabantu nokuqinisa ukusebenza komphakathi. Unethemba lokuthi ngokunikeza abasebenzi basesibhedlela lolu hlelo, kuzobasiza ukuthi belaphe futhi babhekane nezinselelo zeziguli ezine-DRTB

‘Kunesidingo sokufakwa kohlelo lokuyeka ukubhema njengengxenye ebalulekile yokuphathwa kwe- DR-TB eNingizimu Afrika,’ kusho uShangase. ‘Iziguli eziningi zizwakalise ukuthokozela uhlelo i-Nicotine Replacement Therapy (NRT) nokwesekwa ngokwezengqondo ukuze basizakale bayeke ukubhema. Okunye ukuthi kube nezinhlelo zokuqeda isizungu nokuqinisekisa ukulandelwa kwezinqubomgomo zokubhema zesibhedlela ukuze kulekelelwe iziguli zingafinyeleli kalula kugwayi zisasesibhedlela.’

Uklonyeliswe ngesitifiketi sokubonga umsebenzi wakhe ebesikhishwe yisibhedlela i-King Dinuzulu Hospital, Don McKenzie Hospital ne-Charles James Hospital lapho ebenza khona ucwaningo lwakhe.

Ucwaningo lususelwe ocwaningweni oluxhaswe ingxenye yi-National Research Foundation of South Africa (Unique grant no: 105671).

Amagama: Melissa Mungroo 

Isithombe: Sinikeziwe