Izitshudeni zase-UKZN Ngobusuku Bokufundisa Ngezifo Zengqondo obebubanjelwe ekhempasini Yekolishi Lezobudokotela.Ubusuku Bokufundisa Ngesifo Sengqondo Enyuvesi Yezobudokotela
Click here for the English version
Ukunqoba Isifo Sokhwantalala kwakuyisiqubulo sobusuku Bokufundisa Ngokuphila Ngokwengqondo obebusekhempasini i-Medical School.
Lo mcimbi ubuhanjelwe abamele izinhlangano ezihlukahlukene okuhlanganisa noMkhandlu Wabafundi BaseSikoleni SezokweLapha (MSRC), i-Nazareth Tertiary Student Association, i-Twelve Apostles Student Association, i-Twelve Apostle Church In Christ (TTACCSO), izitshudeni nababeyizitshudeni zasenyuvesi.
Obhekelele Ezokuthuthukiswa Kwabafundi ku-MSRC, uMnu Zimkhitha Ntozakhe, uthe lo umcimbi wenzelwa ukukhuthaza ukufundiswa kwabafundi ngezifo zengqondo kubafundi base-UKZN, ikakhulukazi ingcindezi yengqondo. Kwethenjwa ukuthi ukufundisa okufana nalokhu kungasiza izitshudeni zikwazi ukubhekana kangcono nalokhu okwaziwa njengezingcindezi zekhulunyaka lama-21, phecelezi “stresses of the 21st century”.
USihlalo we-TTACCSO eSikoleni SezokweLapha, uMnu Vusi Shabalala, uqhakambise ukuthi enye yezinto ezibangele ingcindezi ukuzikhipha inyumbazane, yingakho-ke ukuhlangana kwezitshudeni kunganciphisa umthwalo ngendlela ethize.
OwayenguMongameli we-MSRC, uMnu Ahmed Raja, uncome i-TTACCSO ngalo mkhankaso wathi: ‘Kuyancomeka kakhulu ukuba i-TTACCSO ihambe phambili kulo mkhankaso – ngikubona lokhu njengesinyathelo sokuqala esibheke endaweni efanele.’
Umcimbi waqala ngegiya eliphezulu njengoba kwakunezinhlobonhlobo zemidlalo eyayenziwa ngabantu bonke.
Amagama: NguLihle Sosibo
Umfanekiso: Uhlinzekiwe