USolwazi wase-UKZN Ushicilele Incwadi Entsha

BY: .

Click here for the English version

I-Making Sense of Research (Van Schaik, 2018) yisihloko sencwadi entsha eshicilelwe uSolwazi wase-UKZN u-Keyan Tomaselli wasesizindeni i-Centre for Communication, Media and Society (CCMS) eSikoleni Sezifundo NgeNhlalosintu Elandelwayo.

Le ncwadi ethathe iminyaka emihlanu, iqukethe izahluko ezingama-32 ezihlanganiswe u-Tomaselli kanye namamojuli ayi-13 abhalwe yizifundiswa zasezikhungweni zaseNingizimu Afrika nezinye ezimbalwa zasemanyuvesi aphesheya. Kubabhali abangama-26, bangaphezulu kwabayi-15 asebeke basebenzisana ne-UKZN. 

Abasebenzi baseNyuvesi ababambe iqhaza bahlanganise uSolwazi Ruth Teer-Tomaselli, Solwazi Donal McCracken, Solwazi Paulus Zulu, Solwazi Franco Frescura, Dkt Eliza Govender no-Dkt Lauren Dyll.  Laba nabanye ababhali basebenzise amava abo nolwazi kwezokufunda ekulungiseleleni abafundi uma sebeyoqala emsebenzini.

Ekuqaleni, uTomaselli uchaza uthi: ‘Ngangifuna ukubhala incwadi ezokwenza ucwaningo luthokozise, luhambelane nesizukulwane samanje esisebenzisa ubuchwepheshe, futhi ezokwazi ukuzwelana nezimo ezithusayo ezibhekana nabafundi kwezokufunda. Akusiyona nje incwadi mayelana nokuthi “Ulwenza kanjani” ucwaningo kodwa ikhuluma nangokuthi "Lwenziwelwani”.' 

Izahluko eziningi zikhuluma ngokuhlukumezeka ngenkathi kubhaliswa, ukubhala iziphakamiso zocwaningo, ukubhekana nokuphelelwa umdlandla wokubhala, ziphinde zihlinzeke ngemihlahlandlela yokusebenzisana kubeluleki nabafundi.

Okuhlaba umxhwele ukuthi u-Tomaselli ukhuluma nangokulutha ngombhalo wezokufunda, ukuthi ungayibhala kanjani imbudane kodwa uluthe umhloli kanye nendlela okwenzeka ngayo nokuthi kungani kwenzeke lokhu.

Esinye isahluko sikhuluma ngamathuba omsebenzi kubafundi abaneziqe kwezesiNtu. Izibonelo zakhe zixubile futhi zithinta nemikhakha yefiziksi, khemistri, izifundo ngamasiko nezezindaba, ezamasiko abonakalayo, umlando, inqubonhle nezahluko ezimbalwa ngobuchwepheshe bezokuhlaziywa kokuqukethwe, phakathi kwezinye.

‘Ukushicilelwa kumajenali kuwudaba olubalulekile,’ kusho u-Tomaselli. ‘Ngakho ke kule ncwadi kukhona okufanele wonke umuntu, kuhlanganisa nososayensi bezekuphilayo nabezenhlalo futhi isebenzisa okwenzeka nsukuzonke uma kufundwa noma kusetshenzwa ngokwababhali. Izahluko namamojuli kuthuthukiswe ngesikhathi eside kusetshenziswana nabafundi nesikhungo esilawula ucwaningo.’

OwayeyiSekelashansela e-University of the Free State uSolwazi Jonathan Jansen uthe ngalo msebenzi ka-Tomaselli omakhasi angama-460: ‘Ayikho incwadi efana nalena esike yashicilelwa. Inamahlaya, ihlinzeka ngolwazi, futhi kwezinye izingxenye  ayihloniphi, le ncwadi ibhekiswe elungwini lesikole eliselisha elisazama ukuqondisisa ngezokufunda emhlabeni wezobuchwepheshe.’

USolwazi Jean Steyn weSikole Sezifundo NgeNhlalosintu Elandelwayo uthe: 'Izinhloko zeminyango, amadini kanye nabaphathi enyuvesi yonke kumele bayifunde le ncwadi. Bazobona ngokushesha izimo nezigameko ababhekana nazo nsukuzonke ekuqondisiseni ngesikhungo. Isisombululo sakho konke lokhu sitholakala encwadini kaSolwazi Tomaselli’.