ISikole SezeMfundo Sibambe Umhlangano Wokucobelelana Ngolwazi Ngabangezwa

BY: .

Click here for the English Version

ISikole SezeMfundo sibambe umhlangano wokucobelelana ngolwazi ngokungezwa ukuze kulekeleleke othisha abafundisa abafundi bobuthisha abanezingqinamba ngokuzwa kanye nolwazi lokusetshenziswa kolimi lwezimpawu lwaseNingizimu Afrika i- South African Sign Language (SASL) ekhempasini.

Lo mhlangano, oyingxenye yenyanga yabangezwa, ibizwe ngokomyalelo weDini eyiNhloko  yeSikole, uSolwazi Thabo Msibi, ukuze kulekelelwe abantu abanezinselelo zokuzwa ekhempasini i-Edgewood.

Obehola lo mkhankaso uDkt Lolie Makhubu-Badehorst onguthisha onentshisekelo ngezindaba ze-SASL ebambisene noNkz Rosh Subrayen wasehhovisi lase-UKZN lezabaphila nokukhubazeka ekuhlelweni kwalo mhlangano.  

Abebefundisa emhlanganweni bekuwuthisha ongezwa uNkz Monica Sutcliffe, noMqondisi wase-Deaf SA, uNkz Odette Swift.

UMakhubu-Badenhorst uthe: ‘Umhlangano ububalulekile futhi unesidingo esikhulu ngoba ungowokuqala walolu hlobo ekhempasini i-Edgewood. Ube isiqalo sokungase kwenziwe yiSikole sezeMfundo ukuze kufundiswe othisha ngabangezwa nokuhola umkhankaso wokuthuthukiswa kohluzifundo ze-SASL KwaZulu-Natali.’

Umhlangano ubuhlanganise ukufundiswa ngezindlela ezifanele nezingafanele zokuxhumana nabantu abangezwa, ukufunda ukusebenzisa uimi lwezimpawu kanye nosiko lwakhona.

Ngenkathi ebuzwa ngezinhlelo zokufundisa ngokungezwa ekhempasini uMakhubu-Badenhorst uthe: ‘Sihlele ukuhlanganisa uhlelosu oluzobhekana nezindaba zabangezwa jikelele ukuze silwenze ingxenye yamamojuli/izinhlelo zabaphila nokukhubazeka. Kuzoba nokusebenzisana esikhathini esizayo lapho kuzoba nokucwaninga okuhlanganisa imikhakha ehlukene nokuqeqeshwa kothisha base-Edgewood nabanye othisha abasebenzayo. Sihlele nokuthuthukisa izifundo ezifingqiwe ze-SASL ukwelekelela abangezwa.’

Ngu-Melissa Mungroo