Isifundiswa sase-UKZN sethule inkulumo emhlanganweni wezokufundisa nge-HIV/AIDS obubanjelwe e-Port Elizabeth

BY: .

Click here for English version

Ongumfundisi omkhulu eSikoleni SezeMfundo, uDkt Kathleen Pithouse-Morgan, ubeyisikhulumi sosuku  emhlanganweni i-7^th Annual HIV and AIDS Education Community of Practice (CoP) obubanjelwe eNyuvesi i-Nelson Mandela Metropolitan e-Port Elizabeth.

U-Pithouse-Morgan ubemenywe uSihlalo WeKomidi EliLawulayo, uSolwazi Naydene deLange, ukuzokwethula inkulumo emhlanganweni.

Uhlelo i- Higher Education and Training HIV/AIDS  (HEAIDS) Community of Practice (CoP) lwasungulwa ngenxa yesidingo  sokuxhumanisa izinhlelo zezemfundo ephakeme nezokufundisa nge-HIV/AIDS kuzwelonke eNingizimu Afrika.

I-HEAIDS CoP iyakubona ukubaluleka kweqhaza elibanjwe ezemfundo ekuhlonzeni amathuba okuthola i-HIV ne-AIDS, lokhu kungavimbela imithelela ye-HIV ne-AIDS enhlobonhlobo futhi elimazayo kuphinde kuqinise izinga lokulwisana nalesifo.

I-CoP ihlanganisa izifundiswa ezisebenza ngokufundisa nge-HIV ne-AIDS emkhakheni wezemfundo ephakeme eNingizimu Afrika lapho kunamanyuvesi angama-23 nezikhungo zokuqeqesha kwezobuchwepheshe ezingama-50. Imihlangano yaminyaka yonke ye-CoP ihlinzeka izifundiswa ngamathuba okusebenzisana, ukuxhumana, ukwabelana ngolwazi,nokuqhamuka neziphakamiso ngokubambisana ezindabeni eziphathelene ne-HIV ne-AIDS kwezokufunda nokufundisa kanye nezocwaningo.  

Enkulumweni yakhe yosuku ebinesihloko esithi : Ukufundisa Ngandlelaningi Kukathisha Ngengculaza ,u- Pithouse-Morgan ukhulume ngezinkondlo njengenye yezindlela zokufunda nokufundisa kanye nokucwaninga nge-HIV and AIDS.

‘Imibhalo yocwaningo ekhakheni we-HIV ne-AIDS ibhalwe ngendlela esebenzisa ulimi oluqondile,’ usho kanje. ‘.  ‘Ulimi oluqondile lungathathwa njengolimi olubhalwa ngendlela yeprozi(alubhalwa ngendlela enobunkondlo). Futhi luthathwa njengolimi olusetshenziswa ngezindlela eziqondile, ezingenamizwa, ezingenamcabango futhi ezingahehi. Uma uqhathanisa, ulimi lobunkondlo luyaheha, lukhombisa ukucabanga futhi luyagqugquzela.’

Inkulumo yakhe ikhombise ukuthi izinkondlo zinconwa njalo abacwaningi nabafundisi njengendlela yokufinyelela nokwethula isimo sempilo ngokuchaza ngemizwa, izinkolelo, amaphupho, amathemba, nokwesaba. Inkulumo iphinde yagcizelela iqhaza elingabanjwa yizinkondlo ekuletheni ubuciko nobuliminingi kwezokufunda nokufundisa kwezemfundo ephakeme.