ISekelashansela, Dkt Albert van Jaarsveld, ne neKhansela Isamu Yamaguchi woMnyango weNxusa laseJaphani nabafundi basesikoleni iBonela Secondary School emcimbini wokwethulwa kwelebhu ehambayo yase-UKZN ngaphansi kohlelo i-Science4U. Uxhaso Lwezimali LwamaJaphani Lwenze i-Science4U Mobile Science Lab Yaba Impumelelo
Click here for English version
I-Science4U, okuyilebhu kanokusho ehambayo yase-UKZN esebenza ngaphansi kwesizinda i-Science and Technology Education Centre (STEC), ithulwe ngokusemthethweni.
Uxhaso olukhulu olutholakale enxuseni laseJaphani ebelimelwe iKhansela Isamu Yamaguchi, nongumxhumanisi wephrojekhthi uNkz Nomthandazo Hoboyi, lwenze iKolishi YezoLimo, YezobuNjiniyela NezeSayensi lakwazi ukuthenga laphinde laguqula iveni eyi-Mercedes Vito.
Uxhaso lweveni luhlelwe i-UKZN Foundation okuyiyona exhumanise i-UKZN Scince Centre nohlelo lweNxusa laseJaphani i-Grant Assistance for Grassroots Human Project.
Umxhumanisi wesizinda sesayensi uDkt Tanja Reinhardt, uthe: ‘Iveni i-Science4U likhombisa impokophelo yethu yokuhlinzeka ezemfundo zesayensi kuwo wonke umuntu’
Leli veni, elakhiwe futhi lahlinzekwa ngezinsiza zokwenza umsebenzi kucwaninga wefiziksi nekhemistri, selihambele izikole lihlinzeka ngezinsiza zelebhu kubafundi.
Le moto ekwazi ukusebenza abafundi abangama-50, inezinsiza zobuchwepheshe bohlobo oluphezulu eziyi-15 ze-SPARK Science Learning System okuwuhlobo lwezinsiza oluhlanganise ithuluzi lokufaka imininingo nelihlola ngemibuzo okuhlinzeka ngethuluzi eliqoqa imininingo ngendlela elula.
‘Izinsiza ze-SPARK Science Learning System zisebenza ngamabhethri okwenza kube lula ukusebenza ezikoleni ezingenawo ugesi noma uma usanqamukile,’ kuso u-Reinhardt.
Ucwaningo lukhombisa ukuthi ukuzibambela mathupha uma kufundwa kunomthelela omuhle kubafundi ngoba kukhuphula izinga lokufunda, kufundise amakhono amasha,kuthuthukise nolwazi mayelana nemisebenzi kwezesayensi.
‘Sithemba ukuthi abafundi bazozuza kulolu hlelo ngokuthola ulwazi olwengeziwe futhi bathakasele izifundo zesayensi okuzoholela ekuthuthukeni komqondo ogxile kwezesayensi,’ kusho u-Reinhardt.
UReinhardt uthe imiphumela yesikhashana kuya kweside yokusebenza kwelebhu izothuthukisa amazinga okufunda isayensi nezibalo kubafundi basezikoleni ezisemiphakathini entulayo. ‘Lokhu kuzothuthukisa izinga lempumelelo nesibalo sabafundi abangena enyuvesi.’
Abafundi baseBonela Secondary School bebekulo mcimbi wokwethula obuhlanganise nenkulumo kaSekelashansela wase-UKZN uDkt Albert van Jaarsveld ogqugquzele abasha ukuthi bathande izifundo isayensi waphinde waqinisekisa ukuthi inyuvesi iyobamukela uma sebeqede ngempumelelo izifundo zabo zesikole.
Sally Frost