Ithuba Lokwazana Kubafundi Ekhempasini iEdgewood

BY: .

Click here for English version

Ihhovisi Lenyuvesi Lezamazwengamazwe libe nohlelo ekhempasini i-Edgewood lokuxhumanisa abafundi ukuze bazane kangcono futhi bafunde nangamasiko ahlukene. 

Amazwe abemelwe bekuyi-DRC, Malawi, Burundi, Rwanda, Kenya, Uganda, Cameroon, Nigeria, Zimbabwe, Lesotho neNingizimu Afrika lapho abafundi basezweni ngalinye bebethula izinkulumo ngamasiko abo.

UMnu Achiri Atanga wase-Cameroon uthe ibhola likanobhutshuzwayo linjengenkolo ezweni lakubo, ugcizelele nokuthi selibe yizingqwele zase-Afrika kane futhi sebezuze izindondo zegolide eziningi emidlalweni yama-Olimpiki e-Sydney. 

UMs Deca ‘Feoma wase-Nigeria uthe izwe lakubo linabantu abalinganiselwa kwizigidi ezingama-170, izizwe ezingama-250 nezilimi ezingama-521

Obemele izwe lase-Zimbwabwe uthe izwe lakhe laziwa ngezinga eliphezulu labakwazi ukufunda nokubhala futhi lihlonishwa ngenxa ye-Victoria Falls ne-Wange Game Park okuyizinto eziheha izivakashi.

Abebebambe iqhaza bakhuthazwe ukuba baphakamise bazwakalise imibono yabo mayelana nezinselelo ababhekene nazo eNyuvesi njengabafundi abangabokufika.

Okuphakanyisiwe kuthinta usizo lokwelashwa, izinhlelo zokuhlanganiswa namanye amakhempasi, izindawo zokuhlala zeNyuvesi zabafundi abaneziqu lapho abafundi bengahlala khona nemindeni yabo uma ibavakashele, ezomnyango wezasekhaya nezokubonelelwa ngezimali.

UNkz Slindile Kanyile (SRC) ululeke abafundi ukuthi abahlangane bakhe inhlangano i-ISA (Inhlangano Yabafundi Bamazwengamazwe).

UNkz  Nombuso Mtshali waseHhovisi Lezamazwengamazwe likhuthaze abafundi ukuba baxhumane nehhovisi ukuze kuxoxiswane ngezinto ezibalulekile kubona ukuze kuthathwe izinyathelo zokuthi bathole usizo.

Ihhovisi Lezamazwengamazwe selisunguliwe ekhempasini i-Edgewood futhi livuliwe njalo kusukela ngoMsombuluko kuze kube uLwesihlanu.

UMnu Adebayo uzwakalise ukubonga eHhovisi Lezamazwengamazwe ngokwenza umcimbi omuhle ngalolu hlobo.