Ungoti Owudokotela Wamathambo Wase-UKZN Uklonyeliswe Engqungqutheleni Yezwe Lonke

BY: .

Click here for English version

Umabhalane omkhulu ongudokotela wamathambo omgogodla ohlinzayo e-Grey’s Hospital uDkt Khangelani Sondovana uklonyeliswe nge-Professor S. Govender Free Paper Award ngocwaningo oluvelele ngomgogodla kwi-South African Orthopaedic Association (SAOA) Congress yangonyaka wezi-2025.

USolwazi Shunmugam Govender wayengudokotela womgogodla ohlonishwayo osahlonishwa nanamuhla emkhakheni wokwelapha nokuhlinza amathambo. Wayeshumayela ivangeli lokucwaninga, ukufundisa nokuqeqesha emkhakheni kanti washiya igama elingalibaleki kulo mkhakha. Ukumhlonipha, umndeni wakhe ne-SAOA minyaka yonke baklomelisa ucwaningo oluvelele ngaphezu kwawo wonke oluthinta amathambo kwingqungquthela. Lo mklomelo ungama-R20 000.

“Lolu cwaningo lukhanyisa ngezinga lokufa kwabantu abahlinzelwe ukulimala isingezansi emazweni antulayo naphakathi nendawo ngokomnotho neNingizimu Afrika. Uma kubhekwa ukunqaba kokutholakala kwale mininingwane, lolu cwaningo kungenzeka lubeneqhaza elimqoka ngezinqumo zokwaba izinsiza kwezempilo,” kusho i-SAOA.

USondovana uthe: “Lokhu kuklonyeliswa bekungeke kwenzeke ngaphandle kwezeluleko ezimqoka zabeluleki bami oDkt Alberto Puddu noDkt Herman Pieter Mare. Ngibonga ngiyanconcoza kwi-Pietermaritzburg Orthopaedic Complex ngosizo olukhulu nokungikhuthaza kulo lonke lolu hambo.

“Imiphumela yocwaningo iqhakambisa ukubaluleka kwezindlela ezididiyele zemikhakha yokwelapha ehlukene futhi kuqhakambisa ukuzimisela kwezikhungo ezinjengesethu, okuthi nakuba kusweleke izinsiza kodwa ziyaqhubeka zizinikele emsebenzini osezingeni eliphezulu ekuqeqesheni, ocwaningweni nasekunakekeleni iziguli. Lo msebenzi ingubufakazi bamagalelo ocwaningo, ukuzinikela ekufundiseni nasekuqeqesheni ongoti bangomuso – konke okumqoka ekuthuthukiseni ukwelapha okuncike ebufakazini emiphakathini esisebenza kuyona; ‘Inkunzi isematholeni’,” kusho yena.

Umlingani kaSondovana, uDkt Mario Rankin, ongudokotela wamathambo ohlinzayo nongumfundisi omkhulu e-UKZN – waxhaswa ngosizo lokucwaninga lwe-SAOA ngonyaka wezi-2025 ukwenza imisebenzi yakhe ehlukene yocwaningo. Kumanje u-Rankin wenza iziqu zobudokotela ezigxile ekusebenzeni kokuvikeleka ezifweni zama-human chondrocyte. Lo mklomelo ngowamalungu e-SAOA enza ucwaningo oluhle nolungendlela entsha yokwenza izinto ezintsha emkhakheni wamaThambo.

“Kukhuthaza kakhulu ukuthola umklomelo onje. Akugcini nje ngokungikhuthaza ohwambweni olusindayo lweziqu zobudokotela kodwa futhi kwenza ngihlonishwe phesheya ngocwaningo lwami,” kusho u-Rankin. “Le mpumelelo ibingeke ngaphandle kosizo lwabeluleki bami oSolwazi Alex Sigal, Len Marais no-Soma Pillay, kanjalo nabalingani nabangani bami egunjini lokucwaninga i-African Health Research Institute. Ngifisa ukubonga Isikole SezobuDokotela sase-UKZN ngokungeseka kwaso.”

Amagama: wuLunga Memela 

Izithombe: Zithunyelwe