Izifundiswa Zase-UKZN Zikhulume Ngemibono Yokuqeda Ubukholoni Engqungqutheleni Yezenkolo Yaphesheya

BY: .

Click here for English version

Izifundiswa zezeNkolo zaseNyuvesi yaKwaZulu-Natal (UKZN) oDkt Beverly Vencatsamy noDtk Cherry Muslim, baseSikoleni SezobuCiko, bebekwi-XXIII International Association for the History of Religion (IAHR) World Congress e-Krakow, e-Poland.

Le ngqungquthela ethathe isonto lonke, ebise-Jagellonian University e-Krakow, e-Poland, inyuvesi yesibili ngobudala eYurophu, ibinezingxoxo ngesayensi, izingxoxo zezifundiswa, ukuhlangana kwezifundiswa zasemhlabeni jikelele. Abahleli bebehlose ukwenza ukuthi kubendawo ephapheme neyokuthuthukisa ukucwaninga kwezenkolo emhlabeni jikelele. Le ngqungquthela, ondikimba yayo ibithi ‘Out of Europe: Studying Religion(s) in Interconnected Worlds’, ibheke ukushayisana okunobuciko phakathi kwezimpande zaseYurophu zalo mkhakha nokusabalala kwawo emhlabeni jikelele ngenkathi ibheka imuva nekusasa lawo.

O-Vencatsamy no-Muslim bethule amaphepha abo ocwaningo bedingida indikimba yezinkolo emikhakheni exhumene, ngethemba lokulandela imvelaphi yokusimama kwalo mkhakha nokubheka izindlela ezintsha. USolwazi Vencatsamy ubemele i-Association for the Study of Religion in Southern Africa (ASRSA), lapho enguNobhala Jikelele khona. 

Iphepha locwaningo lika-Muslim, ebelibizwa ngokuthi ‘From Apparent Imposter to Affirmed Expert: Navigating Positionality in Islamic Studies Scholarship’ belibheka ukujula nokushintsha kwezimo zobuSulumane ngokwesimo seMfundo ePhakeme yaseNingizimu Afrika. Uchaze ukuxhumana kobunjalo, ulwazi nokwemukeleka okusemthethweni kwamava akhe eZifundo ZobuSulumane nokufundisa ezenkolo.

“Ekugcineni ucwaningo lwami luyindlela ethile yokubheka isimo sezifundo zenkolo, lukhombisa ukuthi ubunjalo abuwona umkhakha omile kodwa buyinto eshintshayo kuye ngesimo nesikhathi. Ngokukhombisa ukuxhumana phakathi kwamava abantu, okulindelwe wumphakathi nokusebenza kwezemfundo, lolu cwaningo lwami luphosa esivivaneni sezingxoxo ezibanzi ngokukwazi ukushintsha, ubungcweti nesimo semfundo sokwenziwa,” kusho u-Muslim.

Iphepha locwaningo lika-Vencatsamy, ebelithi ‘Decolonising Religious Studies: Challenging the World Religions Paradigm in the South African Educational Context’, libheke ngokubanzi i-World Religions Paradigm (WRP), ebhebhezela indlela yokwenza izinto yaseYurophu enohlelo lokunqinda imibono yenkolo okungesiyona eyobuKrestu, yaseNtshonalanga neyabelungu. Ebuka ngeso lomkhakha wezenkolo obanzi waseNingizimu Afrika, ukhombise isidingo esiphuthumayo soguquko ezifundweni zezenkolo.

Akhela phezu komfutho we#MustFall (wangowezi-2015-nowezi-2016), ucwaningo luka-Vencatsamy lubheka ukuthi imihlahlandlela yobukoloni kwezemfundo iqhubeka kanjani nokubumba ukukhiqizwa kolwazi nezemfunfo ezifundweni zezenkolo. Iphepha lakhe locwaningo likhombise ukuthi i-WRP ihluleka kanjani ukuqoqa izindlela zenkolo ezihlukene nenjululwazi yemiphakathi ecindezelwe.

Ebheka ingqungquthela, u-Vencatsamy uthe, “Nakuba bekukhuthaza ukubona ububanzi bocwaningo abantu akade babelana ngabo, kubuye kwaqhakambia umsebenzi osele ekusabalaliseni imibono emqoka nelwa nemibono yobukoloni ekufundweni kwezenkolo.”

U-Vencatsamy wengeze ngokuthi: “Ukubamba iqhaza kule ngqungquthela kubeyithuba eliyingqayizivele kimina, hhayi kuphela ngokwabelana ngemibono kodwa futhi ukudingida nezifundiswa ngqo omsebenzi yazo iyisisekelo sohambo lwami locwaningo.”

Amagama: wu-Jennene Naidu

Isithombe: Sithunyelwe