I-Durban City FC Yenze I-UKZN Yaziqhenya Emdlalweni Wabo ne-Chiefs

BY: .

Click here for English version

INyuvesi yaKwaZulu-Natal (UKZN), abaxhasi abaziqhenyayo be-Durban City FC, ibilethe isasasa le-Premier Soccer League ekhempasini ngenkathi izovukuza abalandeli esangweni eliku-Varsity Drive ekhempasini yase-Westville ngoLwesine lomhlawama-30 kuMfumfu wezi-2025.

Lo mcimbi ubugubha ubunye bomphakathi nokuziqhenya kweNyuvesi ngenkathi abasebenzi nabafundi noPhiko LwezokuXhumana ne-mascot yaseNyuvesi ‘u-Impi’ bequnga iqembu lasekhaya ngaphambi komdlalo walo obubhekwe ngamehlo abomvu ne-Kaizer Chiefs ngakusasa. Bekudlange umculo, umfutho imikikizo namakhwelo ukulungiselela usuku lomdlalo.

Le mvunge yasekhempasini ikapakele komunye umkhankaso wokudoba abalandeli e-Moses Mabhida Stadium emahoreni ambalwa ngaphambi kokuqala komdlalo, ebingukuseka i-Durban City FC okufanele okulindeleke kubantu base-UKZN beseka iqembu elibongelwa kuthiwe yi-Citizens’.

Kuqhwize umentshisi ngenkathi kufika isikhathi sokuqala komdlalo e-Moses Mabhida. Ukuphuza ukuqala komdlalo kuphakamise amaphaphu, lapho i-Kaizer Chiefs ibizimisele ukugoduka nawo wonke amaphuzu. Ngemva kokukhala kwempempe, izivakashi beziwuthwele umdlalo kodwa i-City yavimba ngokuzimisela futhi ihlasela ngeqhinga ifolosa ngo-Joslin Kamatuka no-Trevor Mokwena, ababekhathaza i-Chiefs ngejubane nomjiko kwabo.

Isiwombe sokuqala siphele zibambene kungekho efake igoli, okukhombisa ukuvimba ngokuzimisela kwe-City nokubambisana kwayo. Ngesiwombe sesibili abaqeqeshi be-Chiefs o-Cedric Kaze no-Khalil Ben Youssef benze ushintsho oluthele izithelo.

Ngomzuzu wama-88^th, u-Gaston Sirino ugobe kahle ibhola elithole u-Flavio da Silva, olingqofele phakathi, izivakashi zanqoba ngo-1-0, umphumela obuhlungu kwi-Citizens. Lokhu kunqoba kukhuphulele i-Chiefs endaweni yesithathu kwi-log ye-PSL table, kwathi i-Durban City yehlela endaweni yesine ngemuva kokuhlulwa okokuqala ekhaya ngale sizini.

Nakuba idliwe kodwa abalandeli be-Durban City abazange badangale. Iqembu liqhubekile lakhombisa ukuqina, isibindi nobunye, izinto esezilenze labangelinye lamaqembu athembisayo akwaKwaZulu-Natali. Ifu lombala oluhlaza sasibhakabhaka wabasebenzi base-UKZN, abafundi nabafundi bakudala ukhombise ubunye bokubambisana nokuziqhenya kwenyuvesi neqembu.

Omunye umfundi ufakazile ngemva komdlalo wathi: “Asinqobanga kodwa sikhombisile ukuthi singobani – sinothando, siyaziqhenya futhi siyalwa.”

Uyaqhubeka umshikashika kwi-Durban City FC nabalandeli bayo base-UKZN osekelwe ekuziqhayiseni, uthando nenkolelo enqala yokuthi bazowunqoba umdlalo olandelayo.

Amagama: wuNombuso Dlamini

Izithombe: wuSethu Dlamini