Owenza i-PhD Ubandakanyeke Esigungwini Somhlangano we-Y20 SA 80th UN General Assembly

BY: .

Click here for English version

UMnu Luthando Molefe owenza iziqu zobuDokotela e-UKZN ubambe iqhaza eMhlanganweni-jikelele wama-80 weNhlangano Yezizwe ye-Youth 20 (Y20) eNingizimu Afrika (UNGA 80) obubanjelwe e-SA Permanent Mission ku-UN eNew York, nakwi-inthanethi.

Ibishayelwa yi-Y20 yaseNingizimu Afrika, iQembu elisemthethweni lokuxoxisana nentsha lama-20 (G20) laseNingizimu Afrika linika abaholi abasebasha amandla okubumba inqubomgomo yomhlaba wonke ngokuxoxisana, ukumela kanye nokwenza. I-UNGA 80 Roundtable yahlanganisa ndawonye amaqembu okuxoxisana, izikhungo zomhlaba wonke kanye nomphakathi ukuze kubhungwe ngezindaba ezibaluleke kakhulu.

Lezi zinto zazihlanganisa izinguquko ezikhungweni zomnotho zamazwe ngamazwe kanye nezikhungo zomnotho zomhlaba, ukuqinisa ubudlelwano phakathi kwezizukulwane ukuze kube nentuthuko ebandakanyayo nesimeme, ukuqondanisa ukusebenzelana kwe-G20 ne-ajenda yeNhlangano Yezizwe yentuthuko, kanye nokwandisa imizamo ngaphambi kweNgqungquthela Yezenhlalakahle Ye-G20 ngenyanga ezayo. Umhlangano we-Y20 waseNingizimu Afrika - I-UNGA 80 Roundtable ubanjwe ngaphansi kwendikimba ethi: ‘Isizukulwane Sobulungiswa: Ubuholi Bentsha Esikhathini Esisha Samazwe Ahlukahlukene ’.

Umhlangano wama-80 yeNhlangano Yezizwe - ngaphansi kwendikimba ethi ‘Better Together: ibungaza Iminyaka Engama-80 Nangaphezulu Yokuthula, Intuthuko kanye Namalungelo Abantu’ - iyindikimba eyinhloko eyenza imithetho nenqubomgomo yeNhlangano Yezizwe. Kuyisisekelo sokusebenzelana kwezizwe ngezizwe kanye nokwakha ukuvumelana nobumbano.

I-General Assembly ihlangana ukuze idingide izindaba zamazwe ngamazwe ezihlanganiswe nguSomqulu weNhlangano Yezizwe ezinjengokuvikela ukuthula nokuvikeleka kwamazwe ngamazwe, ukugqugquzela ukuqondana nokusebenzisana ngokusebenzisa izinhlangano zamazwe ngamazwe ezigxile emalungelweni okulingana nokuzikhethela, kanye nokuzuza ukubambisana kwamazwe ngamazwe ekuxazululeni izinselele zomnotho, ezenhlalakahle, ezamasiko kanye nezobuntu ngaphandle kokuhlukanisa maqondana nobuhlanga, ubulili, ulimi noma inkolo.

Ephawula ngokuqokwa kwakhe, uMolefe uthe: “Ubumbano phakathi kwezizwe ngezizwe selubucayi kakhulu kodwa futhi lubalulekile kunakuqala njengoba amazwe amaningi emhlabeni ebhekene nezinselelo ezahlukene ezifana nokuthula kanye nokuvikeleka, ububha nendlala, ukulingana kanye nokushintsha kwesimo sezulu. Ngakho-ke, ezombangazwe zamazwe ngamazwe kanye nokusebenzelana kwezizwe ngezizwe kunikeza uhlaka lokuthi amazwe ahlangane futhi abhunge ngezindaba ezicindezelayo nokuthi zingabhekwana kanjani nazo. Ngibonga kakhulu ngokuba phakathi kwabambalwa abakhethiwe ukuthi bafake imibono yabo kulesi sithangami esibalulekile nesifike ngesikhathi esifanele.”

Njengengxenye yokusingatha kweNingizimu Afrika amaqembu ahlukene e-G20, uMolefe ekuqaleni kwalo nyaka uqokwe ukuba asebenze njengelungu leQembu Elisebenzayo le-Y20 SA.

Umbhalo: yiNdabaOnline

Isithombe: Sithunyelwe