UDkt Simo Mthethwa Wase-UKZN uyi-2024 CoRE-Math Fellow Yase-Uppsala University

BY: .

Click here for English version

Umfundisi omkhulu weZibalo eNyuvesi yaKwaZulu-Natal (UKZN) uDkt Simo Mthethwa ungomunye wabacwaningi abayisikhombisa abaklonyeliswe ngomfundaze wokwenza ucwaningo omkhulu nge-Africa-Europe Cluster of Research Excellence in Mathematics (CoRE-Math) e-Uppsala University.

Le mpumelelo enkulu iqhakambisa amagalelo aqhubekayo kaMthethwa kwisayensi yezibalo neqhaza le-UKZN emisebenzini yokubambisana yocwaningo.

UMthethwa uthanda ukucwaninga ngethopholoji, umkhakha ongomumo wezindawo nomumo wezikhala nokungashintshi kwazo ngisho kushintsha ukuma kwezinto.

UMthethwa uzoya e-Sweden njengoba kuwuMfumfu ukuyothatha indawo yakhe yokubawumcwaningi eMnyangweni weZibalo e-Uppsala University. Esekwa yi-CoRE-Math, uhambo lwakhe luzogxila ekubambisaneni ocwaningweni nabalingani baphesheya ngezinto ezenzeka kwizibalo, okubalwa kuzona imikhakha enjenge-aljebra, ukuhlaziya, ijiyomethri ne probability theory.

Umkhankaso we-CoRE-Math, eyasungulwa ngoMandulo ngonyaka odlule, iwumkhankaso owodwa wamaqoqo angama-21 ocwaningo enziwe ngokubambisana phakathi kwe-African Research Universities Alliance (ARUA) ne-Guild of European Research-Intensive Universities (The Guild). Inhloso yalolu hlelo wukuqinisa amandla okucwaninga nokuqeqesha ngocwaningo ezikhungweni zemfundo zase-Afrika nokugqugquzela ukubambisana phakathi kwe-Afrika neYurophu emikhakheni emqoka.

Ucwaningo i-CoRE Math, exhaswe ngokuphelele yi-Uppsala University, yahlelwa yi-International Science Programme, inika abakhethwayo ithuba lokubambisana nabacwaningi abavele baphesheya. Igxile kubafundi abenza iziqu zobudokotela emikhakheni ehlukene nezifundiswa esezivele zingodokotela ezenza ucwaningo nezifundiswa zasezikhungweni zase-Africa ngokugxila emandleni okucwaninga nokukhipha amangwevu ezwekazini.

“Ukuqokwa kukaDkt Mthethwa ukuthi abewumcwaningi kungubufakazi bezinga locwaningo oluvela ezikhungweni zemfundo zase-Afrika ezinjenge-UKZN,” kusho uMholi weZifundo kwiZibalo uSolwazi Gareth Amery.

Nakuba isicelo esisemthweni se-UKZN sokubayilungu le-CoRE-Math sisacutshungulwa kodwa iNyuvesi ithathwa njengomlingani ofanele ukuthi ingangena kulolu cwaningo. Ukufakwa kukaMthethwa kukhomba amathuba empumelelo yesicelo nokwemukelwa okuhle kwe-UKZN kubalingani abakhona, okubalwa kubona iMakerere University, i-University of Amsterdam ne-University of Oslo.

Ngesikhathi ese-Sweden, uMthethwa uzohlangana nelinye iqoqo labacwaningi base-Afrika yonke. Umcwaningi ngamunye kulindeleke ukuthi axhumane nabacwaningi base-Uppsala University, aphose esivivaneni sokusebenzisana emikhakheni ehlukene yezibalo okubalwa kuyona i-Fourier analysis, i-stochastic processes, i-celestial mechanics nethopholoji. Inhlosongqangi yocwaningo akusikho ukuthuthukisa ucwaningo ezibalweni kuphela kepha futhi wukuyisebenzisa ekubhekaneni nezinselelo ezikhona zenhlalo nomnotho e-Afrika.

“Iqhaza le-UKZN kulolu cwaningo lukhombisa ingqophamlando enkulu ohlelweni lwayo leqhinga lokusabalela phesheya nokuzinikela okuqhubekayo obambiswaneni locwaningo oluphezulu,” kusho u-Amery. “Iqhaza likaDkt Mthethwa kulindeleke ukuthi licabe indlela yokuthi kubanjiswane ngomuso ukugqugquzela abanye abacwaningi base-UKZN ukuthi balandele amanye amathuba anjalo.”

Ephawula ngaleli thuba, uMthethwa uzwakalise injabulo ngalolu hambo azoluthatha, wabalula ubumqok bokusebenza nabanye abacwaningi bezibalo nokuphosa esivivaneni ezwekazini ukugquguquzela ukuvelela kwisayensi yezibalo. 

Amagama: wu-Sally Frost

Isithombe: Sithunyelwe