Ukubaluleka Kwamakhono Ezezimali Kugcizelelwe Embuthanweni Wolwazi Obeluhlelelwe Abafundi

BY: .

Click here for English version

Ukufunda ngezezimali kanye nezamabhizinisi bezihamba phambili ohlelweni lwase-UKZN okuhloswe ngalo ukuhlomisa abafundi ngamakhono adingekayo ukuze bakwazi ukuhamba uhambo kahle emhlabeni onzima wezezimali kanye nezamabhizinisi.

Lo mcimbi ubuhlelwe ngaphansi kobuholi be-RA yase-Mabel Palmer Residence ekhempasi yase-Howard College, uMnuz Sphesihle Jwilisi, osibonile isidingo esiphuthumayo sokuthi abafundi, ikakhulukazi abenza unyaka wokuqala, bahlonyiswe ngolwazi lwezezimali olusebenzayo ekuqaleni kohambo lwabo lwezemfundo.

Lolu hlelo lugcizelele ukubaluleka kolwazi lwezezimali, okuhlanganisa ukuphathwa kwezimali komuntu eyedwana, ukuhlelwa kwesabelomali, ukugwema izikweletu kanye nezindlela ezihlakaniphile zokutshala izimali. Ngokubhekana nalawa makhono ayisisekelo, abafundi bakulungele kangcono ukwenza izinqumo ezinolwazi lwezezimali phakathi neminyaka yabo yasenyuvesi nangale kwalokho.

Ngaphandle kwemfundo yezezimali, kuxoxiswane ngezohwebo nokusungula izinto ezintsha. Isikhulumi esiyisivakashi uDkt Andrisha Beharry-Ramraj ovela kwiSikole Sezohwebo (School of Commerce) waxoxisana nabafundi ngamathuba okuqala nokukhulisa amabhizinisi, ukuhlola izindlela zokuthola imali nokuxhumana nezinhlelo zokusekela izikhungo. "Lokhu kubaluleke kakhulu eNingizimu Afrika, lapho ukuntuleka kwemisebenzi kuseyinselelo enkulu futhi usomabhizinisi uqhubeka nokuvela njengento ebalulekile ekuthuthukisweni kwezomnotho," kusho uBeharry-Ramraj.

Kubafundi abenza unyaka wokuqala, lolu hlelo beluwukungenelela ngesikhathi esifanele. Nokuyilapho abafundi beshintsha ukusuka esikoleni samabanga aphezulu kuya enyuvesi bekuvame ukuba yinselelo ngezibopho zezezimali ezintsha eziba yingxenye yokuba senyuvesi komfundi, okuhlanganisa nokuphatha izimali ezingenayo zibuya ekhaya noma kuxhaso, izindleko zendawo yokuhlala kanye nezibopho zezidingo ezijwayelekile. Ngaphandle kwesiqondiso, abafundi abaningi bangena ezikweletini noma benza izinqumo ezingalungile ngokwezezimali.

Lolu hlelo lunikeze amasu asebenzayo okwakha ukuziphatha kahle kwezezimali, ukugqugquzela ukuzimela kanye nokuzethemba.

Lo mcimbi uphinde wadala inkundla ebalulekile yokuthi abafundi baxhumane, bashintshisane ngemibono futhi bavuse umoya wokuba wosomabhizinisi.

Osomabhizinisi abangabafundi uMnuz Owami Khuzwayo kanye noMnuz Inganathi Mhlungulwana wase-Enactus UKZN bakhangise ngamabhizinisi abo, i-MaliYethu Fintech Solutions ne-Saferise. Lawa mabhizinisi enziwa abe yimpumelelo ngokwesekwa yi-Enactus UKZN. Phakathi neseshini, u-Owami kanye no-Inganathi babelane ngohambo lwabo njengabaholi bamabhizinisi abasebasha futhi bagqamisa indlela amabhizinisi abo anikela ngayo ekuxazululeni izinkinga zomphakathi ezicindezelayo.

Amathuba nemiqhudelwano ehlinzekwa e-UKZN iyaqhubeka nokuhlomisa abafundi ukuthi bafeze izinhloso zabo. Abaningi babahlanganyeli bohlelo bazibophezele ekujoyineni i-Enactus UKZN futhi baqale uhambo lwabo lwezamabhizinisi.

Abahlanganyeli abaningi bazwakalise ukuthi ukuqonda okuzuziwe kuzobakhuthaza kanjani ukuthi bangagcini nje ngokuphatha kangcono izimali zabo kodwa futhi basungule izindlela ezintsha zokukhiqiza imali ngenkathi befunda.

UJwilisi uthe: “Umbono walolu hlelo uwukuhlakulela ikhono labafundi, ukukhuthaza ukuzimela ngokwezimali nokulungiselela abafundi ukuphila ngemva kwasenyuvesi.”

Umbhalo: yi-NdabaOnline

Isithombe: Sithunyelwe