Kuhlelwe Umbukiso weSayensi Wabafundi Besikole i-Silver Heights Secondary Obubanjwe e-UKZN

BY: .

Click here for English version

I-UKZN College of Agriculture, Engineering and Science (kafuphi i-CAES) nokuyiKolishi lezolimo, ubunjiniyela kanye nesayensi lisingathe abafundi base-Silver Heights Secondary School ekhempasini yaseMgungundlovu lolu suku kube olugcwele ukuvundululwa kwesayensi kanye nokufunda okugqugquzela ukuzibambela mathupha.

Cishe intsha engama-90 evela kwiBanga le-10, 11 kanye nele-12 yayiseqenjini elalihlelelwe, abanye babo okwakungabantu abajwayelekile ababebambe iqhaza ohlelweni lwe-CAES BAS (Be A Scientist for a Week) ngowezi-2023 nasekuqaleni kwalo nyaka. Intshisekelo eqhubekayo kanye nokuzibandakanya kwentsha kwezesayensi kuyinkomba yomthelela wohlelo lwe-BAS kanye nokuxhumana okuhlala njalo olukhuthazayo phakathi kwe-UKZN nentsha ethanda isayensi.

Abafundi bahlukaniswa ngamaqembu ayisithupha, ngalinye liqondiswa abafundi abazinikele asebeqhuba iziqu nabahlala nabo usuku lonke, okubasiza ukuba bazulazule ochungechungeni lwezikhathi kanye namaseshini ajabulisayo nagqugquzela ukubamba iqhaza.

Ekuseni, amaqembu adingida la maphuzu alandelayo athakazelisa kakhulu: (1) Endaweni ebizwa nge-Bews Herbarium, u-Dkt Benny Bytebier kanye noDkt Christina Curry bethula ukuqoqwa kwezitshalo ezilondoloziwe futhi bachaza imibhalo yezinhlobonhlobo zezemvelo; (2) E-Frank Bush Museum, umgqugquzeli uNkz Rendani Luthada-Raswiswi ubonise izibonelo zebhayoloji nezinto zobuciko ukuze abasize baqonde isimo sokwakheka komzimba nokuhlukaniswa kwezinhlobo zezinto eziphilayo; (3) Endlini Yezilwane UMnu EB Alley uchaze indima yezilwane ocwaningweni lwesayensi nokubaluleka kokunakekelwa kwesimilo; (4) E-Zebrafish Lab, abafundi, beholwa ngabafundi baka-Professor Carola Niesler asebaqhuba iziqu zabo, bethulwa ngokuthi i-zebrafish isetshenziswa kanjani ezifundweni zofuzo kanye ne-biomedical, kanti (5) Ophikweni Lwe-Microscopy and Microanalysis, abagqugquzeli uNkz Cynthia Matyumza kanye noNksz Tivana Moonsamy banikeze abafundi ithuba lokubuka umhlaba wangempela welebhu nokuzilolonga; uhambo lokugcina lube kanje: (6) uNkz Alison Young kanye nabafundi abaphothule iziqu ze-Botany bathatha intsha bahamba bedlula e-Botanical Gardens yaseNyuvesi kanye nokuvakasha kwelebhu, okugqamise ucwaningo lwesayensi lwezitshalo endaweni esebenza nsukuzonke.

Ngemva kwekhefu elifushane letiye, amaseshini aphinde aqala ngaphambi kokuba abafundi bahlangane engxenyeni yokugcina yosuku - Inkulumo Yezolimo/Yezemisebenzi eyenziwa nguNksz Cindy Chamane weHhovisi Lezokuxhumana Lomphakathi le-CAES okhulume nabafundi ngokubaluleka kwesayensi yezolimo ekubhekaneni nezinselele zomhlaba wangempela, izindlela ezihlukahlukene zokufunda e-UKZN, nokuthi abafundi bangaqala kanjani ukuzilungiselela manje ukuze baphumelele esikhathini esizayo.

Lokhu kuvakasha kwezemfundo kunikeze abafundi amazwibela empilo yasenyuvesi kanye namathuba amaningi abalindile emikhakheni yesayensi, ezolimo kanye nocwaningo.

Umbhalo: yi-NdabaOnline

Isithombe: Sithunyelwe