Umcimbi Wokuqwashisa Ngokuhlukunyezwa Kanye Nokucwaswa Ngokobulili Ibe Ngosuku Lwabesifazane

BY: .

Click here for English version

Ikhempasi yaseMgungundlovu ye-UKZN ibe yisizinda esigcwele umoya wobumbano nokumela amalungelo ngoSuku Lwabesifazane lapho abafundi, abasebenzi kanye namalunga omphakathi behlangene emcimbini obizwa ngele-GBV Awareness Walk and Pledge.

Ihlelwe nguMnyango Wezindaba Zabafundi NezokuHlala – ngophiko lwethimba olubhekelele inhlalakahle nempilo, umcimbi uphinde yaqinisekisa inqubomgomo yeNyuvesi yokungabekezeleli udlame olusekelwe ebulilini, kuyilapho ithuthukisa imigomo yoHlelo Lukazwelonke Lwamasu (i-NSP) mayelana Nodlame Olusekelwe Ngokobulili Nokubulawa Kwabesifazane (i-NSP ku-GBVF) kanye Nezinjongo Zentuthuko Eqhubekayo zeZizwe Ezihlangene (SDGs).

Indikimba ibithi: ‘Thuthukisa Abesifazane - Thuthukisa Isizwe’, i-GBV Walk idonse izinhlaka ezahlukene zababambe iqhaza, okuhlanganisa abamele isiShayamthetho sase-KZN, i-National Prosecuting Authority, osonhlalakahle bakwa-Lifeline, uMnyango wezokuHlunyeleliswa kweziMilo, i-Alexandra Police Station Women’s Desk, Aurum PopInn, Uthingo Network, Fidelity Security Company, SANBI, i-Civil Society Forum and safety, kanye noMasipala waseMsunduzi.

Ukuhlukunyezwa kanye nokucwaswa ngokobulili (kafuphi i-GBV) kusengenye yezinselelo eziphuthumayo nezilimaza kakhulu eNingizimu Afrika, ethinta ngokulinganayo abesifazane, izingane kanye namalungu e-LGBTQIA+ (nokuyi-lesbian, gay, bisexual, transgender, queer, questioning, intersex, asexual, and other gender and sexual identities). I-GBV Walk isebenze njengekhwela elihlatshelwe ukwakha inkundla yokuxhumana kanye nenkundla yemfundo, ubumbano, kanye nokwelapha.

Umcimbi uqale phambi kwengadi yasesigcinamabhuku, lapho abafundi bebehlangene khona begqoke izikibha ezibhalwe imiyalezo ye-GBV, bekhombisa ngokuziqhenya izingqwembe ezinemiyalezo ethi ‘No Means No’ kanye nethi ‘UKZN Says No to GBV’.

Liholwa yilowo oyi-Residence Life Officer uMnu Mzwandile Mhlongo, lo mzila ubuhamba ngo-Golf Road, Ridge Road kanye no-Alan Paton Road, uphelele e-King Edward Main Gate nalapho kube khona umzuzu wokuthula nobekuyisikhashana sokuhlonipha izisulu ze-GBV, kulandele iSifungo sase-UKZN, esiholwa ngu-Residence Life Officer uMnu Celuxolo Dlamini, egcizelela ukuzibophezela kweSikhungo kwezokuphepha nobulungiswa.

Lolu suku luphinde lwaba nobufakazi kwabasindile, amazwi okweseka avela eHhovisi lesiShayamthetho saKwaZulu-Natali kanye nemidlalo yobuciko eyenziwe yi-Mflaze Almeida. 

Umdidiyeli we-Residence Life uNksz Nonjabulo Ntombela uncome abafundi abaqinile nababambe iqhaza ngokuphuma ngobuningi babo: “Lokhu bekungaphezu kokuhamba ngezinyawo, kube yisibonelo esiphilayo sokuthi ubudlelwano bungaguqula kanjani amagama abe yisenzo.I-GBV ayinandawo eNyuvesi yethu, ezindaweni esihlala kuzo, edolobheni lethu noma ezweni lethu,” kusho uNtombela.

Uphinde wakhuthaza abafundi ukuthi basebenzise ngokugcwele izinsiza zokweseka abafundi ezitholakala eNyuvesi, egcizelela ukuthi usizo lutholakala ngaso sonke isikhathi. Uphinde wagcizelela ukubaluleka kokukhuluma ngokumelene nanoma yiluphi uhlobo lokuhlukumeza noma udlame, ekhumbuza abafundi ukuthi ukuthula kuyabavikela abenzi bobubi, kuyilapho amazwi aphakanyiswa ndawonye angadala ushintsho futhi akhuthaze umphakathi wesikhungo ophephile, nowesekana kakhudlwana.

Ababambiqhaza bazibophezele ekuqiniseni izinyathelo zokuvimbela kanye nokusekela, bephawula ukuthi ukubambisana kubalulekile ukuze kube noshintsho olunesisindo.

Isikhulu se-Residence Life uSethenjwa Nduli, obeyingxenye yomdidiyeli nomgqugquzeli walo mcimbi, ukugcizelele ukuthi i-GBV Walk ibingaphezu nje kophawu, kunalokho bekuwukungenelela okunesu elihambisana nezibopho zikazwelonke nezamazwe ngamazwe. ‘Uhlelo lwethu lubonisa ngokuqondile i-NSP ezinhlosweni ze-GBVF zokuvimbela, ukuphepha kanye nokuziphendulela. Ngokwenza kanjalo, futhi siqhubekisela phambili i-SDG 3 (Impilo Enhle Nenhlalakahle), i-SDG 5 (Ukulingana Kobulili), kanye ne-SDG 16 (Ukuthula, Ubulungiswa, Nezikhungo Eziqinile). Lokhu kumayelana nokudala izindawo eziphephile, imiphakathi enempilo, nesiko lokulingana. I-NSP ye-GBVF ihlaba ikhwelo lokuthi umphakathi ongenako ukwesaba nodlame, ugcizelele ekuphenduleni okudidiyelwe, nokwazi ukuhlanganisa imikhakha eminingi,’ kusho uNduli.

I-GBV Walk ihlanganise izimiso ezishiwo ngokukhuthaza ubudlelwano phakathi kweNyuvesi, abomthetho, izinhlangano ezingekho ngaphansi kukahulumeni (ama-NGO), kanye nezinhlaka zomasipala, futhi ibiyingxenye yomkhankaso wase-UKZN Wokuqwashisa nge-GBV, ohlanganisa ukusungulwa koPhiko oluzinikele lokuphenya Ngodlame Olusekelwe Ngokobulili olutholakala kuwo wonke amakhempasi. Lolu phiko lusebenzisana eduze ne-Risk Management Services (RMS) ukuze kuqinisekiswe ukuphathwa kwamacala kugxile kosindile, okuyimfihlo, kanye nanolwazi lokuhlukumezeka.

Umbhalo: nguSethenjwa Nduli

Izithombe: Zithunyelwe