USolwazi Ntombifikile Mtshali wase-UKZN Uyisifundiswa Esivelele Emfundweni Yobuhlengikazi Ngowezi- 2024

BY: .

Click here for English version

USolwazi Ntombifikile (Fikile) Mtshali, onguSolwazi oSafufusa eNyuvesi yaKwaZulu-Natali (e-UKZN) nonguMabhalane Omkhulu nesikhulu esiphezulu se-South African Nursing Council (i-SANC), umenyezelwe yi-ScholarGPS, njengeSifundiswa Esivelele sangonyaka wezi-2024, kwenza wabalwa nezifundiswa ezivelele ezingama-0.5% emhlabeni jikelele emkhakheni wemfundo yobuhlengikazi.

Lokhu kuklonyeliswa kungubufakazi bamagalelo amakhulu kaMtshali emfundweni nokubangumholi wemfundo yobuhlengikazi selokhu abakhona kulo mkhakha I-ScholarGPS, yinkundla ebheka umsebenzi wokucwaninga wezifundisa ezingaphezu kwezigidi ezingama-30 nezikhungo zemfundo eziyizi-120 000, abacwaningi abenza iziqu ze-Onazi abakhombisa amagalelo amakhulu nabahlale bephokophele izinga eliphezulu emfundweni.

UMtshali uhlonishwe ngemiklomelo yokubayiSifundiswa Esivelele emikhakheni emibili:

•    I-Top Scholar - Ukuphila Konke: Wakleliswa endaweni ye-137 emhlabeni Emfundweni yoBuhlengikazi

•    I-Top Scholar - Iminyaka Emihlanu Edlule: Wakleliswa endaweni yama-22 emhlabeni Emfundweni yoBuhlengikazi

Le miklomelo ikhombisa umsebenzi wakhe wokucwaninga, amandla ocwaningo lwakhe nokuhlale ezinikele ekuthuthukiseni imfundo yobuhlengikazi nokubelethisa e-Afrika jikelele nasemhlabeni wonke.

UMtshali, onamaphepha ocwaningo angaphezu kwangama-90 – okubalwa kuqona acishe abengama-76 kumajeneli ocwaningo oMnyango weMfundo ePhakeme nokuQeqeshwa – izihluko ezili-15 zezincwadi namaphepha ocwaningo ali-11 emibikweni ye-World Health Organization (iWHO) yobuhlengikazi nokubelethisa, unamava aziwayo kulo mkhakha. Okuqaphelekayo ngamaphepha ocwaningo amaningi awabhale nabafundi bakhe abenza iziqu zobudokotela acashunwa emiqingweni eminingi emhlabeni okubalwa kuwona i-The Nursing and Midwifery Workforce in the Africa Region 2022.

Useke weluleka abafundi abenza iziqu zobudokotela abangama-21 nabafundi abenza iMasitazi abangama-34 base-Afrika yonke, okukkhombisa ukuzinikela ekucijeni abantu kwezemfundo nokuqeqesha.

Emsebenzini wakhe wakudala e-UKZN, uMtshali wayeyiDini yokuFundisa nokuFunda eKolishi leSayensi yezeMpilo, uMqondisi we-WHO Collaborating Centre for Nursing and Midwifery. Wake walawula i-Nursing Education Partnership Initiative (i-NEPI) engaphansi kwe-International Center for AIDS Care and Treatment Programs (i-ICAP) e-Columbia University.

Ikhono lakhe lalekelela amathimba ezifunda e-WHO nohulumeni abehlukene base-Afrika – okubalwa owaseCongo-Brazzaville, e-Democratic Republic of the Congo, e-Eritrea, eLesotho, eRwanda, eNamibia, e-Seychelles, eNingizimu Afrika naseTanzania – ekuqiniseni inqubo nomsebenzi ebuhlengikazini nasekubelethiseni. Useke wasebenza engusolwazi ovakashile kula mazwe, wasiza izikhungo ukuthi zilandele imfundo ebheka amagalelo omuntu.

UMtshali uyilungu elihlonishwayo nomcwaningi wezinhlangano eziningi kulo mkhakha, okubalwa kuzona i-Sigma Theta Tau International Honor Society of Nursing, i-Academy of Nursing in South Africa ne-Southern Africa Foundation for Advancement of International Medical Education and Research (i-FAIMER) Institute.

Egameni leKolishi leSayensi yezeMpilo, iSekela lePhini Shansela neNhloko yeKolishi, uSolwazi Busi Ncama ubongele uSolwazi Mtshali kakhulu ngalokhu kuklonyeliswa kwakhe. “Ukuzinikela kwakhe, izinga eliphezulu emfundweni lakhe nobuholi bakhe buyaqhyubeka nokuphakamisa umsebenzi wobuhlengikazi nokuphucula imfundo yezokwelapha e-Afrika jikelele.”

Amagama: wuNombuso Dlamini

Isithombe: Sithunyelwe