Kusukela kwesobunxele, uSolwazi u-Leigh Jarvis; uSolwazi Neil Koorbanally, iBamba leDini yoCwaningo e-UKZN; uDkt Nhlanhla Msomi; uMqondisi weZinto Ezintsha e-UKZN, kuthi emgqeni ophambili kubeMnu Wayne Mostert noSolwazi Anil Chuturgoon besayina isivumelwano sokusungul inkampani entsha.I-UKZN ne-Youtility Basayine Ingqophamlando Yokusebenzisana Ukuguqula Indima Kagesi YaseNingizimu Afrika
Click here for English version
INyuvesi yaKwaZulu-Natali (i-UKZN), egxathwini elikhulu lokubuyekeza ikusasa likagesi, isayine isivumelwano sokusungula inkampani entsha yobuchwepheshe i-Youtility.
Lobu budlelwano bokusebenzisana obuzoshintsha izinto buzokwethula ubuchwepheshe obusezingeni eliphezulu obuzoshintsha indlela ugesi ophathwa ngayo nosatshalaliswa ngayo, lapho khona kuzokhokhwa ngendlela yobuchwepheshe i-blockchain.
Lesi sivumelwano siyigxathu elimqoka embonweni we-UKZN wokuba yinyuvesi yokuqala yaseNingizimu Afrika esebenzisa amandla avuselelekayo, okusho isinyathelo esibalulekile ekusunguleni umhlahlandlela ngendlela yokusabalalisa ugesi ezweni lonke. I-Eskom Distribution, ngenxa yokubona ubuhle balobu buchwepheashe obusha, izobamba iqhaza esigabeni sokuqaphela nokweluleka, okuzokwenza i-UKZN ibeyindawo yokuqala yokuhlola lobu buchwephe bokuphehla amandla ezweni.
Ekhuluma emcimbini wokwethula nowokusayina obusekhempasini yaseWestville, iBamba leSekela lePhini Shansela loCwaningo neZinto Ezintsha uSolwazi u-Anil Chuturgoon uwuthakasele lo msebenzi wathi “uyingqophamlando” ekubhekaneni nezinselelo ezindala zikagesi zaseNingizimu Afrika.
“Lo mqondo wamandla kagesi ohlanzekile uzoguqula indima kagesi eNingizimu Afrika,” kusho iBamba loMqondisi we-Eskom Power Plant Engineering Institute (EPPEI) Programme e-UKZN, uSolwazi Leigh Jarvis enanela ethi lolu bambiswano athe lusho ubuholi obunombono, ukucabanga ngendlela entsha wase ezibophezela oguqukweni olubonakalayo.
“Emnyombweni walo wukubona ukuthi ikusasa likagesi lilele ezindleleni zokwenza izinto ngezindlela ezintsha nezindlela zikagesi ezisezandleni zabanye abahlinzeki bagesi. Lezi zindlela zokuhlinzeka ziyinsika ekwakheni indima kagesi enamandla, eshintshayo nefaka wonke umuntu,” kusho yena.
UMqondisi we-Youtility, uMnu Wayne Mostert, uncome ubuhle bobuchwepheshe be-Youtility, i-Wizdom, okuthiwa buqukethe izinto eziningi. “I-Wizdom iwubuchopho obushintshayo bobuchwepheshe obusamuntu obunamandla okwenza izinto ngaleso sikhathi, buthathe izinqumo,” kusho yena.
Eqhathanisa nezinguquko zobuchwepheshe ezidlule, uMostert ufanise i-Youtility nendlela ubuchwepheshe obadala izinguquko ngayo endimeni yobumnandi.
“Lapho i-Blockbuster yehluleka khona ukushintsha, i-Netflix yadlondlobala isebenzisa idatha, ukushintsha ngokushesha nokulalela izidingo zamakhasimende. Kanjalo i-Youtility izoshintsha umkhakha wamandla ngengqalasizinda ezwa izinto, esabalele nesebenziseka kalula, iqale into entsha emhlabeni,” kusho yena.
U-Jarvis ubalule ubuhle obuningi balo msebenzi oyingqophamlando. “Ukuxazulula indaba yedatha nokwenza izinto bukhoma kuzoshintsha izinto endleleni okusatshalaliswa nokugcinwa ugesi ngayo,” kusho yena.
Lo msebenzi uzokwenziwa ngezigaba ezihlukene emakhempasini ahlukene, okuyi-Westville, i-Howard, i-Edgewood, i-Medical School naseMgungundlovu, kanti kuzoqalwa nge-Westville.
Abafundi bazobaneqhaza elimqoka lokwenza lolu guquko, balekelele ngokunakekela izinsimbi zobuchwepheshe kuya ekwenzeni ucwaningo lokuphucula umsebenzi.
“Ngalesi sivumelwano, sifisa ukubona izinkampani eziholwa ngabafundi nokuxhumana ngqo phakathi kokufunda nezimboni ekubumbeni ikusasa lamandla kagesi,” kusho u-Jarvis.
Amagama: wu-Sejal Desai
Isithombe: wuSethu Dlamini