Izethameli zomhlangano weFUNDISA.I-UKZN Ibinomhlangano weFUNDISA Wokusimamisa Imfundo YoBuhlengikazi NoKubelethisa
Click here for English version
INyuvesi yaKwaZulu-Natali (i-UKZN) ibiyenze umhlangano wezinsuku ezimbili i-Forum of University Nursing Deans of South Africa (iFUNDISA).
Lo mbuthano ubuhlanganise abaholi bemfundo yobuhlengikazi nezifundiswa zasezindaweni ezihlukene ezweni ukuthi zidingide izinto ezimqoka ngekusasa lemfundo, umsebenzi nocwaningo kobuhlengikazi.
I-FUNDISA, yinhlangano ebhalisiwe engenzi nzuzo, eyizwi lezifundo zobuhlengikazi nokubelethisa eNingizimu Afrika. Ididiyela ukubambisana nezingxoxo ezimqoka phakathi kwamanyuvesi angama-21 angamalungu oBuhlengikazi namalungu amabili ngokungagcwele kanti ayashintshana ngokwenza imihlangano.
Lo mhlangano uvulwe ngokusemthethweni wuSolwazi Anna Voce, iDini neNhloko ISikole SezobuHlengikazi neZempilo Yomphakathi. Enkulumweni yakhe ugcizelele ubuhlakani bokubaluleka kwezigcawu ezinjengeFUNDISA ukubumba uhlelo lwemfundo yoBuhlengikazi obuhambisana nezidingo zabantu nobunekusasa.
USolwazi Busi Ncama, iDini neSekela-Shansela leKolishi LeSayensi yeZempilo, lethule inkulumo yokwemukela izethameli. Ubalule Isidingo esiphuthumayo sokuqeqesha abanye abahlengikazi, ikakhulu ababelethisayo, ukuthi bavale igebe kwezempilo KwaZulu-Natali naseNingizimu Afrika yonke.
Kulo mcimbi bekukhona izinkulumo eziqavile zezifundiswa ezimbili ezivelele eBuhlengikazini. UDkt Sharlene Parasnath wethule inkulumo enesihloko sithi ‘Expanding the Frontiers of Nursing in Stem Cell Transplantation and Donation in South Africa’, wakhuluma ngezinto ezenzeka kulo mkhakha omusha wokwelapha. USolwazi Jennifer Chipps ulandelise ngenkulumo ethi ‘Into the Future: New Immersion Clinical Learning’, ebheke izindlela ezintsha zokuqeqesha emkhakheni woBuhlengikazi.
Ngalezo zinsuku ezimbili izethameli zibenezingxoxo, zajula futhi zabonisana ngezindlela zokubhekana nezinselelo nokubona amathuba akhona kulo mkhakha. Umhlangano uphinde wagcwalisa ukuzinikela kweFUNDISA ukusimamisa izinga eliphezulu nokushintsha imfundo yeBuhlengikazi.
Ukuthi umhlangano wakulo nyaka ubuse-UKZN kugcizelele ubuholi bayo nokuzibophezela kwayo ekuthuthukiseni isayensi yezempilo nemfundo yobuhlengikazi eNingizimu Afrika.
Amagama nesithombe: wuNombuso Dlamini