Obuya Kuma-Olimpiki Usese-UKZN

BY: .

Click here for English version

Lowo obenguDokotela omkhulu nosemnkantshubomvu wethimba laseNingizimu Afrika Emidlalweni Yama-Olympic yase-Tokyo yowezi-2024 u-Dkt Phathokuhle Zondi usejoyine iSikole sase-UKZN Sezifundo Ngokwelapha.

UZondi uqokwe ukuthi aqinise imikhakha okugxilwe kuyo njengamanje ocwaningweni, ekufundiseni amabanga aphansi nokufundisa abaqhuba iziqu, kanye nasekwengameleni ucwaningo emkhakheni wezobuDokotela Kwezemidlalo Nokuzivocavoca.

NjengoDokotela ohlonishwa umhlaba wonke kwezemidlalo nokuvivinya umzimba, umeluleki wezemfundo namasu ezempilo, uZondi uletha e-UKZN ingcebo yolwazi oluhlanganisa imidlalo esezingeni eliphezulu, ezempilo yomphakathi kanye nokubusa kwebhizinisi.

Ngaphandle kwesikhundla sakhe kuma-Olympics abese-Tokyo, usebenze njengeSikhulu Esiphezulu Sezokwelapha SeQembu LaseNingizimu Afrika kuma-Commonwealth Games wezi-2014, kwiMidlalo Yabantu Abaphila nokukhubazeka e-yabanjelwa e-Rio ngowezi-2016 kanye neMidlalo Yomhlaba –yowezi-2017.

Kusukela ngowezi-2016 kuya kowezi-2024, ube ngusihlalo wekomidi le-Medical Advisory Commission elaziwa ngele-South African Sports Confederation and Olympic Committee (kafuphi i-SASCOC), eyengamele ukunakekelwa kwabasubathi kanye namazinga okunakekelwa ngokwezempilo kwabadlali ezingeni lomhlaba wonke.

UZondi ukhulele elokishini lase-Clermont ngaphambi kokudlulela e-Westville, lapho afunda khona umatikuletsheni e-Westville Girls’ High School ngowezi-2000. Uneziqu ze-MBChB ayithola eNyuvesi yaseKapa, i-MSc kwi-Sports Medicine ayithola eNyuvesi yasePitoli, kanye ne-MBA ayithola e-Gordon Institute of Business Science (GIBS), eseNyuvesi yasePitoli.

Ecabanga ngohambo lwakhe lokungena emkhakheni, uZondi uthe: ‘Ngakhulela emndenini okhuthele kakhulu – ama-fun run, ukujima kwasekuseni, izikhathi zokuzilolonga ntambama kanye nemijaho yangezimpelasonto bekuyingxenye yempilo yethu. Kusukela ngisemncane, ngabona ukuthi kubuyisa ukuzethemba, kwakha umphakathi wakho nje wokuzivocavoca kanye nokuvula iminyango ehlukahlukene.Kwakuhlezi kungikhanga ukuba kwezemidlalo, kodwa ngangithakasela ngokufanayo i-Human Biology neSayensi. Ushintsho lwangempela lwafika lapho ngizwa ingxoxo kaSolwazi Tim Noakes. Kwakuyisikhathi se-eureka - ngabona ukuthi ngingahlanganisa kanjani uthando lwami lwezemidlalo nomsebenzi ogxile kwezesayensi, ezempilo kanye nenjongo yami.’

Ngokuhamba kwesikhathi, umsebenzi wakhe wakhula usuka ekwelapheni abasubathi ngabanye ukuya ekuklameni izinhlelo ezisekela impilo yabasubathi, ngokugxila kakhulu kubasubathi besifazane kanye nemiphakathi engamelelekile kangako. Izindima zakhe zobuholi zihlanganisa ukusebenza njengoNobhala Jikelele weKolishi Lezemidlalo kanye Nokuzivocavoca Kwezokwelapha eNingizimu Afrika, uMengameli we-South African Sports Medicine Association (2015-2017), Umhleli we-British Journal of Sports Medicine, aphinde abe uThisha Osemnkantshubomvu Wezokwelapha Webhola Lombhoxo Lomhlaba. Uphinde abe sophikweni lwamazwe ngamazwe lwe-International Olympic Committee’s (IOC) Advanced Team Physician Course.

Umsebenzi kaZondi wokweluleka uthintana nezinhlaka zikahulumeni kanye nezinkampani, eluleka ngamasu ezempilo, izinhlelo zokusebenza kanye nokusungulwa kwezemidlalo kanye nokuphila kahle. Ucwaningo lwakhe kanye nendikimba yomsebenzi wakhe kugxile ikakhulukazi kwezempilo yabagijimi besifazane kanye nokukhuthaza ukulingana kwezemidlalo, futhi usebenza emabhodini amaningana kazwelonke nakwamanye amazwe kanye namakomiti abeluleki.

Ungumsubathi onamandla naye ngokwakhe, uZondi useqede inqwaba yama-ultra-marathon, imijaho yamabhayisikili yezigaba eziningi, ama-triathlons… waze wafinyelela isiqongweni seNtaba i-Kilimanjaro! Impumelelo yakhe iyabonakala futhi iyaqapheleka: uke wathola Indondo Yokuhlonishwa NgoNgqongqoshe ngowezi-2017 kwathi ngowezi-2023 waqokwa njengenye ye-Mail & Guardian's Businesswomen of the Year.

Ngaphandle kokusebenza kwakhe njengoNgoti emkhakheni, uZondi ungumgibeli webhayisikili wasezintabeni futhi ungumgijimi oshisekayo, ozifelayo ngazo zonke izinto zangaphandle kanye ne-adventure. ‘Uma kuhlanganisa ijubane, i-adrenaline kanye nokuncintisana nje! - mhlawumbe ngike ngakuzama (futhi ngakala nesikhathi),’ usho lokhu emamatheka. Uma ehleli ngaphakathi endlini, uthola injabulo ngokujula emakhasini encwadi emnandi.

Kubantu abasha abasafuna umkhombandlela wempilo yabo, uZondi unikeza la mazwi akhuthazayo. ‘Akuphoqelekile ukuthi ukwenze konke kulunge usaqala nje ukuhlanganisa - kodwa hlala unelukuluku lokwazi, uzinikele, futhi uhlale unomusa. Indlela yakho ingase iphenduphenduke, kodwa konke okufunda endleleni kuyokusiza. Ungavumeli ukwesaba noma ukwehluleka kukuvimbele. Umhlaba udinga izwi lakho, imibono yakho, kanye nesibindi sakho - ikakhulukazi ezindaweni lapho abantu abafana nawe bebengabonwa noma bengaziwa nhlobo. Noma yini okhetha ukuyenza, yenze ngenhloso.’

I-UKZN ijabule ngokuba nomholi osezingeni likaZondi ojoyine iSikole se-Clinical Medicine futhi ibheke ngabomvu iqhaza elibalulekile azolibamba eSikhungweni nasemkhakheni Wezemidlalo Nokuzivocavoca Kwezokwelapha - kuleli nasemhlabeni jikelele.

Umbhalo: MaryAnn Francis

Isithombe: Sithunyelwe