I-UKZN Yeseka Umkhankaso I-Manor Gardens Revitalization Project, Ikhuthaza Ukuzibandakanya Kwabafundi Kanye Nezakhamuzi

BY: .

Click here for English version

Inhlangano eyaziwa ngele-Manor Gardens Ratepayers and Residents Association (MGRRA) ibambisane ne-UKZN ukuxhasa iphrojekthi yokuvuselela umphakathi oseduze nekhempasi yase-Howard College. Lokhu bakwenze beqondanisa isu le-UKZN lokuthuthukisa ulwazi lwabafundi, lolu hlelo luhlose ukuthuthukisa indawo yase-Manor Gardens, nokuyisizinda sabafundi abaningi base-UKZN abahlala ezindaweni eziqashisayo ezizungeze isikhungo.

Isungulwe ukuze ihlinzekele izidingo zabahlali base-Manor Gardens, i-MGRRA ihlose ukubhekana nokugabi bikho sesimeni kwedolobha futhi imele izinqubomgomo zikamasipala ezinobulungiswa. Iqhutshwa umuzwa onamandla wokuzigqaja njengamalunga omphakathi, inhlangano ikhuthaza inkulumomphendulwano phakathi kwabakhokhi bentela nezakhamuzi ngokusungula ubulunga, ikhuthaza ukuqonda izindaba zomphakathi kanye nokukhuthaza ubumbano lomphakathi phakathi kwabanikazi bezakhiwo, abaqashi, kanye nabasebenzi basendaweni.

Ukuphendula maqondana nokunyuka kwezigebengu ezibamba inkunzi, ukweba, kanye nobugebengu obujwayelekile, i-MGRRA ibambisene ne-Community Policing Forums (CPFs), nabahlinzeki bezokuphepha abazimele, kanye noMbutho Wamaphoyisa aseNingizimu Afrika, kanye namaphoyisa kaMasipala ukuze bafake amakhamera onogada kuyo yonke indawo. Nakuba zisebenza kahle, lezi zinsiza zokuphepha zimba eqolo futhi zinenselele zokuzinakekela, okuholele ekutheni inhlangano ifune izixazululo ezisimeme zokuthola imali. Lo mzamo uhlanganise nokulandela inqubomgomo ye-Special Rating Area (SRA), egunyazwe uMasipala weTheku ngaphansi kweSigaba sama-22 soMthetho Wentela Yezakhiwo zikaMasipala. Ngokusebenzisa imodeli ye-SRA yokusetshenziswa okuxubile, zonke izakhiwo, okuhlanganisa kokubili eziqashisayo nezamabhizinisi, zizohlanganyela ezindlekweni, zibe nengxenye ekuthuthukisweni kokuphepha komphakathi nengqalasizinda.

Ngenxa yobukhulu benqubo ye-SRA, okwamanje, i-Manor Gardens Urban Improvement Precinct (MGUIP) isisungulwe njengesixazululo sokuphatha izidingo zenqubomgomo. USihlalo we-MGUIP Steering Committee, uMnuz Shaun Kruger, oyiLekshara e-UKZN eSikoleni Somthetho, uchaze ukuthi uhlelo lokuvota lwe-SRA ludinga u-66+1% wezakhamuzi kanye no-50%+1 wamabhizinisi endawo ukuze kuvuneke isinqumo sabo. 'Njengoba besidinga amavoti amaningi kangaka, iKomidi lethu kanye namalungu aqokwe ndawonye omphakathi wase-Manor Gardens basebenze ngokuzikhandla ukuxhumana nabanikazi bezakhiwo ngocingo, izinkundla zokuxhumana, nokubavakashela indlu ngendlu, futhi ngiyajabula ukusho ukuthi kusisebenzele futhi sinesibalo esifanele samavoti,' kusho uKruger. ‘Ngokusungulwa kweManor Gardens Urban Improvement Precinct (MGUIP), sihlose ukwenza ngcono ukuphepha kanye nezinga lempilo yabo bonke abahlala futhi basebenze eManor Gardens, ukuthuthukisa amanani ezakhiwo kanye nokugqugquzela ukusimama kwemvelo nokubumbana komphakathi.’

‘Ikomiti elilawulayo selizofaka isicelo ngokusemthethweni kuMasipala weTheku ukuze kusungulwe i-SRA,’ kusho u-Kruger. I-MGUIP izoqhutshwa yi-SRA Management Company, inhlangano engenzi nzuzo, enomphathi we-MGUIP nomlawuli oqokwe ukwengamela imizamo yayo. ‘I-MGUIP izosayina isivumelwano sezimali seminyaka emithathu nedolobha, futhi imihlangano yaminyaka yonke izoqinisekisa ukuqhubeka nokubandakanyeka komphakathi,’ kwengeza u-Kruger.

UNobhala weKomidi eliLawula iMGUIP uNksz Deidre Taylor unxuse umphakathi ukuthi ubambe iqhaza kulo msebenzi, egcizelela isidingo sokubamba iqhaza kwabafundi nabanikazi bezindawo zokuhlala. ‘Imicimbi efana ne-Bring and Braai kanye ne-Information Day yakamuva ayigcini nje ngokuxhasa ngezimali imizamo yezokuphepha kodwa futhi ihlanganisa izakhamuzi, isize ekuqinisekiseni amavoti e-MGUIP,’ kusho u-Taylor. ‘Sifuna ukwenza i-Manor Gardens iphephe kubo bonke abahlala lapha, kusukela kubahlali kuya kubafundi nakubaqashi ngokufanayo.’

U-Kruger uzwakalise ukubonga eKomidini Lokuqondisa ngokuzibophezela nokusebenza ngokuzikhandla ekutholeni amavoti adingekayo, futhi nakuba uhlelo lokusungulwa kwe-SRA lungakaqedwa, nakanjani kuyisinyathelo esibheke endleleni efanele.

Ukuze uthole ulwazi olwengeziwe nge-MGUIP, chofoza lapha - here.

Umbalo: Hlengiwe Khwela

Isithombe: Sithunyelwe