Umfundi Wonyaka Wokugcina Wezobudokotela Uthakasile Ngokubuya

BY: .

Click here for English version

Umfundi owenza unyaka wokugcina ezifundweni zobuDokotela uNksz Onazo Daniso ujabule ngokubuyela ekhaya ngemuva kokuthola i-Erasmus Clinical Rotation Mobility Scholarship emhlalise amasonto ayisishiyagalolunye e-University of Graz (e-Med Unigraz), isikhungo socwaningo somphakathi sase-Austria.

UDaniso, owafundela ubuhlengikazi e-University of the Free State, wathwasela ukuba umhlengikazi e-Universitas Academic Hospital ngonyaka wama-2018, wedlulela e-UKZN lapho abhalisela khona izifundo zobudokotela ngonyaka olandelayo. EseseNyuvesi wayenguMsizi eMtapweni WoLwazi nelungu loMkhandlu Wabafundi baseSikoleni SezobuDokotela.

Wahlabana ngendondo yomfundi ovelele wonyaka wesine ngonyaka wama-2022 ngokuba yisibonelo sezimiso zeNyuvesi i-REACHt (phecelezi Respect, Excellence, Accountability, Client Orientation, Honesty and Trust) kanti manje umele abafundi bekilasi lonyaka wokugcina nosihlalo wekomiti lonyaka wokugcina wezifundo zobukokotela i-MBChB.

UDaniso uthe wayeyimenenja yomkhankaso weSikole sobuDokotela i-#IMadeaDoctor neLungu le-Golden Key Honour Society.

‘Ukuya phesheya ngiyokwenza ezinye izifundo yinto engangikade ngifisa ukuyenza kodwa ngingazitholi izifundo ezihambisana nesikhathi sezifundo zami. Ngenkathi ngiqala ukubona isikhangiso se-Erasmus Clinical Rotation Mobility Scholarship, ngavele ngabona ukuthi izonginika ithuba lokufeza iphupho lami.’

UDaniso wahlala amasonto amabili e-Med Unigraz wazuza amakhono amaningi okwelapha nezindlela zokwelapha eMnyangweni we-Ophthalimoloji, wahlala amasonto amabili eMnyangweni wezaMathambo neThromatoloji, kwathi amasonto amahlanu okugcina wabaseMnyangweni WokweLapha okuJwayelekile nokuFaka Kabusha Izitho Zangaphakathi. ‘Isikhathi esiningi bengisegunjini lokuhlinza ngathola amakhono engicabanga ukuthi azobawusizo olukhulu emsebenzini wami wobudokotela,’ kusho yena.

UDaniso uthe: ‘Abantu bakhona bayaphila, banobungani. Okube yinselelo enkulu wukuxhumana ngolimi njengoba abantu abaningi bekhuluma isiJalimane, okusho ukuthi ulimi lokufunda e-Med Unigraz yisiJalimane, iziguli nabasebenzi basesibhedlela bakhuluma isiJalimane kakhulu kanti amafayela eziguli angesiJalimane. Nokho, odokotela engisebenze nabo bebenobuntu bangitolikela futhi bangisiza.’

Uthi ngaphambi kokuya e-Graz wayejwayele ukuthola imibuzo yabantu nodokotela yokuthi ufuna ukugxila kumuphi umkhakha. ‘Kusukela kudala ngangihlale ngididwa yimikhakha emibili engafani yezifo zenhliziyo – okungumkhakha wokwelapha othinta izifo zenhliziyo nomkhakha wokwelapha othinta amathambo namalunga komzimba. ‘Ngemva kwamasonto amabili e-Graz ngifunda ngezinto ezithinta ukulapha amathambo namalunga omzimba nesonto nokwenza lo msebenzi isonto ngemva kokubuyela eNingizimu Afrika, kwangikhanyela ukuthi ngithanda kakhulu ukuthola ulwazi kulo mkhakha nokuba usomabhizinisi.’

UDaniso uthi ukuba yedwa e-Austria, ikakhulu ngoKhisimusi nangoNcibijane, kwamenza wacabanga wajula ngempilo yakhe nokuthi usuka kuphi. ‘Ngakwazi ukuqonda ukuthi ngingubani uma ngisendaweni engingayijwayele, ngafunda nangezinto engimandla kuzona nalezo engibuthaka kuzona. Nakuba kwakubuye kubenesizungu kodwa ukuya e-Austria kwabaneqhaza elikhulu ekukhuleni kwami.’

Ukhuthaza abanye abafundi abafundela ubudokotela ukuthi baphokophele ukuvelela. ‘Ubudokotela ngezinye zeziqu ezidinga izinga elithile lokuziphatha… Ngifunde ukuzifuna nokuvama ukuzikhumbuza ukuthi “kungani” njalo uma ngiphela amandla noma ngibhekana nobunzima.’

UDaniso uthanda ukulalela umculo, ukufunda, ukwenza ingadi nokuzivocavoca.

Amagama: wuLunga Memela

Isithombe: Sithunyelwe