Imifundaze YeThuthuka Kubafundi BezeZiqu ZokuHlelwa KwamaBhuku Ezimali Base-UKZN

BY: .

Click here for English version

ISikole seZifundo ZokuHlelwa KwaMabhuku Ezimali, Ezomnotho neZezimali semukele abafundi abali-17 abathole imifundaze yeThuthuka Bursary Fund (i-TBF) ezifundweni zeZifundo ZokuHlelwa KwamaBhuku Ezimali ngemuva kokubuyekezwa kwazo kanzulu yi-South African Institute of Chartered Accountants (i-SAICA).

Uhlelo iThuthuka Bursary wumbhidlango woguquko wongoti ohlose ukugqugquzela abafundi abamnyama ababencishwe amathuba ukuthi babengama-chartered accountant (ama-CA). Lezi zifundo zihambisana neNjongo 2 ye-UKZN, okungukukhiqiza izifundiswa ezinolwazi, amakhono nobudlelwano bokungena emisebenzini enekusasa nekwazi ukushintsha ngokuqhubeka kwesikhathi.

Umkhakha weZokuhlelwa KwamaBhuku eziMali ungaphansi kwengcindezi enkulu yokukhiqiza ama-CA, okubukeka kuyinselelo uma kubhekwa umthamo wokukhiqiza izifundiswa eminyakeni edlule.

I-UKZN inezinhlelo ezengeziwe zokulekelela abafundi bezifundo zokuhlelwa kwamabhuku email ngokwemfundo, ngokwempilo nangokomsebenzi ngenhloso yokuvala igebe lokukhiqizwa kwabafundi abaneziqu nokukhuthaza ukuthi abafundi bavelele ezifundweni.

Abafundi abathole imifundaze ngesonto lokugcina kuMasingana ohlelweni lokwejwayezwa, lapho bethole khona amasu “ngokufunda” nokuthi baphumelela kanjani emsebenzini wabo, babamba iqhaza ekucijweni kwamathimba futhi bezwa nezindaba zempumelelo yamanye ama-CA angabantu abamnyama abhekana nezinselelo ngasekuqaleni ezifundweni nasemsebenzini wabo.

Owayengumfundisi wezifundo ZokuHlelwa KwamaBhuku EzeziMali noseyiMenenja Yohlelo lwe-UKZN Bursary Fund uNksz Hlengiwe Ndlela ubekhona ngeSonto Lokujwayezwa, wacobelela abafundi ngohambo lwezifundo nomsebenzi wakhe, wanika namasu namaqhinga okuphila nokuphumelela uma besanfunda e-UKZN noma sebahamba.

‘Bekuyisonto elimnandi kodwa elinezinto eziningi ne“Zingane zeThuthuka”, eziyiQoqo langowama-2024,’ kusho uNdlela. ‘Kuqinise idolo ukubabona beyeka ukukhathazeka nokwethuka baqala baxhumana, babambisana futhi basebenzisana njengethimba. Siqede isonto ngosuku lokwakhana olumnandi ukubalungiselela isimesta ezayo!’

Abafundi abathole imifundaze nabenza unyaka wokuqala oNksz Andile Khumalo noMnu Ziphozethu Mtambo babonge ithuba, bathi bajabule ngohambo olubahlalele.

‘IThuthuka yinhle futhi iwusizo. (Abantu bayo) basilungiselele uhambo olusihlalele ngokumema abantu abasebenzayo asebeke baluhamba lolu hambo ukuthi basicobelele ngamasu okufunda abasiza,’ kusho uKhumalo.

‘Ngajabula ngenkathi ngithola ukuthi nganikwa umfundaze weThuthuka ngoba kusukela ngisesesikoleni kwakuyisifiso sami ukuba yi-CA. Ngike ngafunda izindaba ngama-CA ake ahlomula nge-TBF ephumelela empilweni kanti ukuthola ithuba lokufeza isifiso sami kwenza ngithakase.’

‘Into engiyithakasele ngesonto lokwejwayezwa wukuthi iThuthuka isikhuthaza ukuthi sikhulume uma sibhekene nezinselelo. Kuhle lokhu, njengoba kukhombisa ukuthi ikhathelele isimo sethu sengqondo,’ kusho uMtambo.

Ngeminye imininingwane ngomfundaze, vakashela ku: https://www.thuthukabursaryfund.co.za/

Amagama: wuLungile Ngubelanga

Isithombe: wuSamkelisiwe Cele