I-UKZN Indlondlobalise Ukubonakala Kwayo Emazweni Angaphandle eGhana NgokuHlanganyena Kanye Nomkhankaso Wokunxenxa Abafundi

BY: .

Click here for English version

I-UKZN ithathe igxathu eliya phambili ekundlondlobaliseni ukutholakala kwayo emazweni angaphandle ngokuvakashela eGhana kwethimba laseNyuvesi ebeliholwa uSolwazi Stephen Mutula, uMphathi neNhloko yeSikole sezokuPhatha, Ulwazi Lwezobuchwepheshe kanye nokuBusa, (i-School of Management, Information Technology and Governance (SMIG)).

Inhloso yalokhu kuvakasha bekungukunxenxela enyuvesi abafundi basemazweni angaphandle kanye nokwakha ubudlelwano bokubambisana.

UMutula uthe: ‘Lokhu kuvakasha kuqondaniswe ngqo nohlelo lweqhinga lase-UKZN lowezi-2023-2032, lokuvuselelwa kabusha kohlelo, ighinga leKolishi lezoMthetho kanye nezifundo zokuPhatha, kanye nesu le-SMIG (UKZN’s 2023-2032 Strategic Plan, Project Renewal, the College of Law and Management Studies Strategy, and the SMIG strategy), konke okudweba umugqa ekuhlukahlukaneni kwabafundi, ukubambisana kanye nokwenza inyuvesi isikhungo somhlaba. Inhloso yesibili yohlelo lwesu lase-UKZN ukunika abafundi isikhathi esisezingeni eliphezulu ngokuhlanganisa umphakathi wabafundi abehlukene. Ngokuyonxenxa abangase babe ngabafundi e-Accra, isikhungo sihlose ukuheha abanye abafundi abehlukene, ukunothisa ulwazi lwezemfundo kubo bonke.’

Ukuhambela e-Accra kubuye kwaba ithuba leSikole lokuqala ubudlelwano bokubambisana nezikhungo zaseGhana kugqanyiswa ucwaningo, ukusungula kanye nezamabhizinisi, ngakho kwesekwa uhlelo lesu lase-UKZN lokuqhakambisa umnikelo osenzingeni eliphezulu futhi onomthelela obonakalayo kulezi zindawo. Ngalokhu kusebenzisana, bobabili i-UKZN kanye nezikhungo zaseGhana bazokwazi ukwabelana ngolwazi, izinsiza kanye nokuzuza ngokubambisana kwezemfundo.

Kuzo zonke izikhungo ezivakashelwe, ithimba lamukelwe amaphini oshansela, izinhloko kanye nabaqondisi bokuxhumana namanye amazwe. Bangaphezu kuka-300 abangase babe ngabafundi ithimba elikhulume nabo ngombono, umsebenzi, imigomo kanye nesu nezinhloso zesikhungo. Amanyuvesi amahlanu adingide nethimba isivumelwano sokusebenzisana esingase sibe khona iMemorandum of Understanding (MOU) ne-UKZN.

Ngokuqhakambisa uhlelo lokundlondlobalisa isikhungo sinabele nasemazweni omhlaba, iNyuvesi iqaphele ukubaluleka kokuxoxisana kwabalingani emazingezi omhlaba kanti uhambo lwethimba lube yindlela yokuzwa amanzi ngobhoko ekukhuleni okungase kwenzeke emakethe yase-Afrika. Ngokuqala ubudlelwane nezikhungo zaseGhana, i-UKZN ingandlondlobalisa ezokuxhumana nabanye, ukuheha abafundi bakwamanye amazwe, kanye nokukhuthaza izifundo zayo emazweni angaphandle.

Ithimba lixoxisane nabafundi abangase babe ngabafundi baso ezikhungweni ezehlukene, kubalwa eNyuvesi yaseGhana, iNyuvesi yaseCape Coast, iPentecost University, iGhana Communication Technology University, Nyuvesi yeSayensi kanye neZobuchwepheshe, iRegent University of Science and Technology, SOS-Hernmann Gmeiner International College kanye nesikhungo sokukhonzela i-East Legon Worship Centre ebandleni lamaPentecost ebelinabazalwane ababalelwa ku-500, u90% wabo obekungabantu abasha abanentshisekelo yokuqhuba izifundo zabo enyuvesi engaphandle kwezwe labo.

Umbhalo: wuSibonginkosi Mabika

Isithombe: Sithunyelwe