Oyisifundiswa sase-UKZN Uhlabene Ngokuhlonishwa Ngendodo Kwezemfundo Yezokwelapha

BY: .

Click here for English version

USolwazi Veena Singaram wase-UKZN uklonyeliswe ngendondo ye-Karolinska Institutet for Research in Medical Education (neyaziwa kafuphi ngele-KIPRIME).

I-Karolinska Institutet yase-Sweden ibalwa njengenye yezikole zezokwelapha ezihamba phambili emhlabeni.

U-Singaram usanda kuqokwa njengeNhloko Yezemfundo Yezobungcweti Bezempilo e-Kolishi lezeSayensi yezeMpilo (neyaziwa ngele-CHS) ehhovisi Lokufunda nokuFundisa.

I-KIPRIME inikezwa njalo emva kweminyaka emibili ngocwaningo oluvelele emfundweni yezokwelapha, kulokhu okuhlanganisa yonke imfundo nokuqeqeshwa kwanoma yimuphi umsebenzi wesayensi yezempilo. Ngokuxhaswa ngezimali yi-Gunnar Höglund kanye ne-Anna-Stina Malmborg Foundation kanye ne-Karolinska Institutet, umkhankaso we-Fellows uhlose ukondla isizukulwane esilandelayo sabaphumelele kwi-KIPRIME ngokunikeza ikharikhulamu ekhuthazayo yokweluleka nokuthuthukisa imisebenzi yabacwaningi bemfundo yezokwelapha emaphakathi.

Abaqokiwe baqokwe yilabo abawine i-KIPRIME edlule, bayiqembu elinamakhono akhethekile omhlaba, nanokuthi bayahlangabezana nenqubo yokuhola izinhlelo zesayensi eziqinile futhi iphrofayli yabo kanye namagalelo abo asenamandla okufinyelela ezingeni eliphakeme uma enakekelwe kahle kanye nokuxhumana.

Enentshisekelo yokubona abafundi bezifundo zobudokotela bechuma, bephumelela futhi bendizela phezulu, uSingaram uthe: ‘Ngiyabonga futhi ngizizwa ngihloniphekile ngokuklonyeliswa ngomklomelo wobudlelwane obusezingeni eliphezulu futhi ngibheke ngabomvu ukuchitha isikhathi e-Stockholm yase-Sweden. Leli yithuba elihle lokuxhumana kanye nokufundiswa yilabo abangochwepheshe nabaholi bomhlaba wonke ocwaningweni lwemfundo yezokwelapha.’

Esikhundleni sakhe esisha, u-Singaram uzogxila ekuthuthukiseni i-ajenda yocwaningo lwezemfundo yezempilo eKolishi futhi aqinisekise imiphumela yesayensi ephezulu. Ngaphezu kokusiza ngokwenza ama-peer reviews, welekelela ekululekweni kwabafundi abaqhuba iziqu kanye nabasebenzi ukuze aqinise amandla ocwaningo eKolishi.

Njengochwepheshe wezemfundo yezokwelapha, imisebenzi yakhe yokufunda nokufundisa igxile ekuthuthukiseni ukuqeqeshwa kwezokwelapha kanye nokukhiqiza ikhwalithi yabafundi abathweswe iziqu kanye nokunakekelwa kweziguli. Unentshisekelo ekhethekile ekuhloleni okwakhayo kokufunda, ukubonisa/ukuqondisa umuntu ngendlela eyakhayo kanye nasezimeni zokufunda ngendlela eguquguqukayo.

Umbhalo kanye nesithombe: nguLunga Memela