I-UKZN Isiza Ekuqinisekiseni Impumelelo yeNdebe Yekhilikithi Yentsha Ephila Nokukhubazeka Kokungaboni ka-2023 eThekwini

BY: .

Click here for English version

ITheku libe nenhlanhla yokubona umcimbi obalulekile wezemidlalo njengoba inhlangano i-KwaZulu-Natal Association of Blind Cricket (i-KZNABC), isingathe ngempumelelo i-Blind Cricket Youth Cup yokuqala ngqa kusukela mhla ziyi-16 kuya ziyi-18 kuNhlangulana kowezi- 2023, e-Kingsmead Oval.

Lo mqhudelwano ubunochungechunge olujabulisayo phakathi kwe-Hollywoodbets Blind Dolphins kanye ne-North West Blind Dragons.Ezinsukwini ezintathu kunalemidlalo emangalisayo, abathandi bekhilikithi nabasekeli babehlangane ukuze babone abadlali bekhilikithi abangaboni bekhombisa amakhono abo amangalisayo kanye nemidlalo. Imidlalo emibili ibibanjwa nsuku zonke, nomdlalo wokugcina ophethe ngomcimbi ohehayo mhla ziyi-18 kuNhlangulana.

Ukwengeza ebuhlotsheni kanye nasempumelelweni yalo mqhudelwano, abafundi baseNyuvesi yaKwaZulu-Natali boMnyango we-Biokinetics, Exercise, and Leisure Sciences (i-BELS) baphokophele phambili ukuzovolontiya. Laba bafundi bebengagcini ngokulungiselela ukudla kuphela kodwa nokuqinisekisa ukuthi abadlali bahlezi kahle futhi banethezekile ngaphambi komdlalo ngamunye.

UDkt Khumbuzile Khumalo (KK), ofundisa e-BELS, uzwakalise ukuziqhenya ngokubamba iqhaza ku-Blind Cricket Youth Cup. Ukusebenzisana phakathi kwe-KZN Association for Blind Cricket kanye ne-UKZN kubonise amandla okusebenza ngokubambisana nokubandakanyeka kwabo bonke abantu. UKhumalo uphinde wagqamisa isipiliyoni esinothisayo abafundi abasithole ngesikhathi bexhumana nabantu abangaboni okokuqala ezimpilweni zabo. Akugcinanga nje ngokujulisa ukuqonda kwabo ikhilikithi kubantu abakhubazekile kodwa kuphinde kwavusa umdlandla wokuthuthukisa abesifazane kwikhilikithi yabantu abaphila nokukhubazeka kokungaboni emehlweni.

Amavolontiya angabafundi ahlabeke umxhwele uma ebona ukuzimisela kanye nokuphokophela okujulile okukhonjiswa yilaba abaphila nokukhubazeka kokungaboni emehlweni abazibandakanya kwezemidlalo. Bazwakalise ukuhlonishwa nokubonga ngethuba lokuba yingxenye yalolu hlelo oluyingqayizivele. Ukusebenzelana eduze nabadlali bekhilikithi be-Hollywoodbets Dolphins Blind Cricket kushiye intshisekelo yaphakade kubafundi, abafunge ukuthi bazoqhubeka nemizamo yabo yokuvolontiya uma benikezwa ithuba ngokuzayo.

I-Blind Cricket Youth Cup ibihlanganise i-North West Blind Dragons nebiqhudelana kanzima ne-Hollywoodbets Blind Dolphins. I-Blind Dragons ibonise umoya omuhle enkundleni kodwa i-Blind Dolphins iyona egcine iphumelele, yathola ukunqoba okumangalisayo kwamaphuzu ayi-5- e-0.

Oyisikhulu seKZNBCA Media and Liaison uMnuz Gift Zungu uthe ujabule kakhulu ngokubamba iqhaza komphakathi wekhilikithi yabaphila nokukhubazeka kokungaboni kulo mcimbi obe yingqophamlando. Ugcizelele ukuthi iningi labadlali linikeza isipiliyoni esibalulekile, ikakhulukazi labo abadlala ezingeni lesifundazwe okokuqala ngqa.

Impumelelo ye-Blind Cricket Youth Cup ibingeke ibe khona ngaphandle koxhaso lwabaxhasi abafana no-Aquelle, Oasis Water, Ashraful Aid, KZN Cricket Union, SANZAF, Hyper Check, ne-BELS. Lo mcimbi ubukhombise ukukhula okumangalisayo kwekhilikithi yabangaboni kanye nomdlandla wabadlali. Nokho, kusenezinselelo, ikakhulukazi isidingo sokuxhaswa okwengeziwe ukuze kuthuthukiswe futhi kugqugquzeleke ezemidlalo.

I-Blind Cricket Youth Cup ishiye uphawu olungacimeki kubo bonke abathintekayo, ikhuthaza umuzwa wobunye nokuthakaselwa ngamakhono nokuzinikela kwabadlali abaphila nokukhubazeka kokungaboni.

Umbhalo: nguNombuso Dlamini

Isithombe: Sithunyelwe