Umbukiso Wemibala Ehlukene Kowezi-2023 Begijimela Ukuqoqa Imali

BY: .

Click here for English version

Abasebenzi beKolishi LezoLimo, ubuNjiniyela kanye neSayensi, (iCollege of Agriculture, Engineering and Science (CAES)) bagqoke izicathulo zabo zokugijima kanye nezingubo ezinemibala egqamile ukuba yingxenye yomjaho wokuzijabulisa waminyaka yonke, iCAES Fun Run ebinengqikithi ethi: Iphasika elinamachaphazelo emibala (Easter with a Splash of Colour!)

Behehwa indathane yemiklomelo - okubalwa owesilisa wokuqala ukuqeda umjaho iFirst Man Home, Owesifazane wokuqala ukuqeda umjaho, iFirst Lady Home, iqembu eligqoke kahle kunawo wonke, iBest Dressed Team, abamele kahle iqembu labo, iBest Team Representation, abavelele ngokuba nomoya weqembu, iBest Team Spirit kanye nowesilisa nowesifazane abaqede ekugcineni iLast Man or Lady Home - abasebenzi bangene kulo moya kanti bebegqoke beconsa. Izingubo kubalwa kuzo ezopopayi abehlukene, abalingiswa baseDisney kanye nama-goggle-eyed minions.

Batheleke ngesibalo esiphezulu, abebeyingxenye bathole isikhwama ebesinezinto zokuzibajabulisa ngaphambi kokuthi bamukelwe iSekelashansela elibambile uSolwazi Fhatuwani Mudau, ofisele wonke umuntu okuhle ekugijimeni noma ekuhambeni ibanga elingamakhilomitha ama-5. ‘Imicimbi efuze le ibalulekile njengoba yakha ubumbano phakathi kwabalingani emsebenzini, futhi iqinisekisa ukuthi iKolishi lisebenza njengomshini onakekelwe kahle,’ kusho yena.

Isikhathi sasekuseni besipholile futhi sinesizotha lapho bekubanjelwe khona umcimbi - e-Ukulinga Research Farm ngaphandle kwaseMgungundlovu – imimoya ibiphezulu futhi izimo zikuvumela ukugijima. Ngesethembiso sokuthi kuzoba khona u-Easter Bunny endleleni, abebeyingxenye basuke ngemuva kancane kwehora le-10, emizuzwini eli-10 besukile bathole isimanga sokuqala sosuku - bekumele bagijime endaweni lapho ababili abebemele isikole ngasinye, bebabhabhadiswe ngempuphu ewumbala.

Owesilisa wokuqala ukuqeda, uMnuz Brandon Wellnecker kanye nowesifazane wokuqala ukuqeda uNksz Wendy Janssens, baqale ngejubane ngesikhathi iningi likhetha ukuhamba kancane epulazini lokucwaninga bebuka indawo esemakhaya base bengena kwiBisley Nature Reserve, lapho bethole ithuba lokubona idube kanye nendlulamithi abayizakhamizi.

Isidlo sasemini esinephunga elihalisayo ebesihlelwe ehholo lezobunjiniyela epulazini liqinisekise ukuthi ngisho abebehamba kancane bakwazi ukufika ekhaya ngesikhathi esikahle.

Imenenja yezokuXhumana noMphakathi eCAES uDkt Sally Frost ubonge wonke umuntu ngokuba yingxenye bekhombisa injabulo futhi udlulise nemiklomelo. Ihhovisi leKolishi linqobe indondo yokugqoka kahle, kwathi eyabakhombise umoya weqembu yaya koNjiniyela kanti eyabamele iqembu labo kahle iqotshwe abeSayensi yeMpilo.

Umbhalo: Cindy Chamane

Isithombe: Sithunyelwe