I-DIFF yase-UKZN Ilungela Unyaka Wama-44

BY: .

Click here for English version

Umlenze wama-44 we-Durban International Film Festival (i-DIFF) ehlelwa yi-Centre for Creative Arts (i-CCA) yaseKolishi lezeSintu izoba mhla wama-20 kuya mhla wama-30 kuNtulikazi wezi-2023.

Lo mgubho uzoveza bukhoma amafilimu e-Cine Centre enxanxatheleni yase-Suncoast, ngokubambisana ne-Avalon Group, yesekwa yiKwaZulu-Natal Film Commission ne-National Film and Video Foundation, phakathi kwabanye abalingani. Ezinye izindawo ezovezwa kuzona zizomenyezelwa sekusondele isikhathi.

Imenenja yeFestiveli, uNks Andrea Voges, uzokwelekelelwa ngabahleli bezinhlelo abangama-15 ukuhlanganisa uhlelo lwamafilimu anohlonze, amaqophamlando namafilimu amafishane nawabafundi. U-Voges wacija ikhono lakhe lokuba wumphathi wezobuciko nezamasiko ezikhundleni ezihlukene ezweni naphesheya kwezilwandle.

'Uhlelo lwe-DIFF lowama-2023 luzogabisa ngemisebenzi yabenzi bamafilimu omicabango yabo, amazwi, ubuciko namehlo kugxile ekwenzeni amafilimu akhuthazayo naxukuza ugebhezi lwezethameli. Ithimba lezinhlelo lizobheka izindaba ezintsha ezizoxhumanisa abaxoxi bezindaba nezethameli,' kusho u-Voges.

Ithimba lezinhlelo zamafilimu amafishane libunjwe ngumsunguli we-Alfreda's Cinema uMelissa Lyde (waseMelika), umqambi, umenzi wamafilimu nosomlando uGreta Morton (wase-Australia), umenzi wamafilimu, umdwebi nomhleli wamafestiveli amafilimu uYanyu Dong (wase-China) nomqambi, umhleli wamasiko nophrojusa uMitchell Harper (waseNingizimu Afrika).

Inadelso Cossa (Mozambique). Abahleli bamaqophamlando ngumqondisi wamafilimu nomqambi uYgor Gama (wase-Argentina nase-Brazil), umqambi nomdidiyeli wezinhlelo u-Egar Ntanyi (waseNigeria) nomqondisi wamafilimu, umqambi nomqondisi wezithombe u-Inadelso Cossa (waseMozambique).

Umbhali nomqondisi u-Indranil Banerjee (waseNdiya), umqambi, nomdidiyeli nomqondisi nomsakazi u-Andrea Cals (wase-Brazil), inkunzi emidwayidwa yomhleli wamafestiveli nomsabalalisi uSafa Morad (waseGibhithe) nomhlaziyi wamafilimu, umhleli nentatheli uTara Karajicoa (wase-Serbia) yibona abazoba yithimba lomkhakha wamaFilimu Anohlonze.

I-DIFF izobanomlenze wesibili we-Isiphethu Student Film Festival, eholwa nguMnuz Sakhile Gumede. Usekwa yithimba lezinhlelo elinombhali nomqondisi uMadoda Ncayiyana (waseNingizimu Afrika), umdidiyeli wezamasiko nomhleli u-Ashok Vish (waseNdiya) nemenenja yamafestiveli nomdidiyeli wezinhlelo u-Ibee Ndaw (waseGambia nase-France). UGumede uzocija izimenenja zezobuciko ezisafufusa o-Aphiwokuhle Moyo noNomthandanzo Nyathi, abaxhaswe yisikhwama soMnyango WezeMidlalo, UbuCiko NamaSiko esenganyelwe yiNational Arts Council.

Ukuhlale wazi nokulandela i-DIFF ezinkundleni zokuxhumana, ngena ohlwini lwabantu abathunyelelwa okwenzekayo ku: https://ccadiff.ukzn.ac.za.

Umbhalo: wu-Melissa Mungroo

Isithombe: Sithunyelwe