Isifundiswa Sase-UKZN siqokwe Ethimbeni LikaNgqongqoshe Elizobuyekeza Umhlahlandlela WezeMfundo

BY: .

Click here for the English version

USolwazi osathatha umhlalaphansi kepha osasebenza eSikoleni SezeMfundo uNithi Muthukrishna uqokwe nguNgqongqoshe Wemfundo Eyisisekelo uNksz Angie Motshekga ukuba abeyilungu lethimba elizobuyekeza Inqubomgomo Esacutshungulwa Yomhlahlandlela Wezidingo Ezikhethekile Kwezemfundo: Mayelana Nokwakha Uhlelo Lwezemfundo Nokuqeqesha Olubandakanyayo (i-Education White Paper on Special Needs Education: Building an Inclusive Education and Training System). 

U-Muthukrishna uthe, ‘Ngizizwa ngihloniphekile ngokuphinde ngiqokwe ukuba ngibambe iqhaza ohlelweni olubalulekile lokwenziwa kwenqubomgomo ezweni, nokuba neqhaza ohlelweni lobulungiswa bezenhlalakahle, ukulingana kanye nemfundo esezingeni yawo wonke umuntu.

Phakathi kwemisebenzi azobandakanyeka kuyo ukuthuthukiswa nokuphathwa kohlaka lokuqalisa kanye nohlelo lokuphatha ukuze kubuyekezwe Inqubomgomo; ukwakha umbono wesikhathi esizayo, imigomo namasu okwakha uhlelo lwemfundo nokuqeqesha olubandakanyayo; kanye nokuphenya imithelela ohlelweni lwezemfundo lulonke, okuhlanganisa uhlelo lwezifundo nokuthuthukiswa kwezikhungo.

UMotshekga uthe ethimbeni: ‘Nginifisela impumelelo ekwenzeni lo msebenzi oyingqophamlando ezweni lonke kanti nginesiqiniseko sokuthi umsebenzi wenu nizowenza ngeso elisha, ubuchule, ukuzinikela nombono owufanele.’

U-Muthukrishna unguSolwazi Oyingqayizivele eKolishi Lezemfundo, eNyuvesi yaseNingizimu Afrika (Unisa). Usebeneqhaza ekuthuthukisweni kwenqubomgomo eNingizimu Afrika kusukela ngowe-1994. Ngowe-1995, waqokwa ngowabe enguNgqongqoshe Wezemfundo ukuba asebenze eKomidini Likazwelonke Lokubukeza Lenhlangano, Ukubusa kanye Nokuxhaswa Ngezimali Kwezikole (National Review Committee on the Organisation, Governance and Funding of Schools (Hunter Committee)). Lolu hlelo lwazisa ukuthuthukiswa koMthetho Wezikole WaseNingizimu Afrika we-1996 (South African Schools Act of 1996). Ngowe-1996-1997, waqokwa nguMongameli wangaphambili waseNingizimu Afrika u-Nelson Mandela ukuba asebenze njengelungu leKhomishana Kazwelonke Yezidingo Ezikhethekile Kwezemfundo Nokuqeqesha (National Commission on Special Needs in Education and Training).

Izinto athanda ukucwaninga ngazo ngezemfundo kwezobulungiswa emphakathini, izifundo ngokujula kokuhlukahluka; ukuhlangana/nokuhlukana emphakathini nezifundo ngezingane. Uyaqhubeka nokubhala amaphepha ocwaningo namabhuku ocwaningo abuyekezwe ngabalingani bakhe ezweni nakwamanye amazwe kanti ulekelela abenza ucwaningo. Eminyakeni edlule, ubengumeluleki ngezemfundo ezikhungweni zasezweni namazwe ahlukahlukene emkhakheni wemfundo.

Umbhalo: wu-Melissa Mungroo

Isithombe: Sithunyelwe