I-UKZN Izosingatha Umkhosi Wababhali Wama-26 Nowaziwa Ngele-Time of the Writer Festival

BY: .

Click here for English version

Isikhungo sezobuciko nesaziwa ngele-Centre for Creative Arts (CCA) esingaphakathi kweKolishi Lezoluntu sizosingatha uhlelo lwama-26 lomkhosi owaziwa ngele-Time of the Writer Festival.

Uhlelo ludidiyele imibukiso ezobe yenziwa bukhoma neminye ezokwenziwa online nezokwenzeka kusukela ngoLwesine, lomhla ziyi-16 kuNdasa kuya kuLwesibili, zingama-21 kuye uNdasa. Uhlelo lokwengeza lwemicimbi yabukhoma yona izokwethulwa ezindaweni ezahlukene eThekwini kusukela ngoLwesithathu, zingama-22 kuNdasa kuya kuLwesihlanu, zingama-25 kuNdasa.

Umgomo womkhosi wonyaka wezi-2023 we-Time of the Writer Festival uthi Placemaking: Roots, Influence, Imagination and Expression. Abasohlwini lwabazobamba iqhaza kubalwa kubo, oFred Khumalo, uNiq Mhlongo, uLebohang Masango, uMakhosazana Xaba, u-Kumi Naidoo no-Yewande Omotoso. Lowo onguMbhali wamanoveli nombhali wemidlalo yeshashalazi, uDkt Sindiwe Magona, uqokwe njengoMbhali Obalulekile wonyaka wezi-2023.

Ithimba labesifazane bodwa yilona eliyibambe ezintanjeni emkhosini wakulonyaka, Kulaba besifazane kubalwa kubo uNksz Nomthandazo Shandu (UKZN), uNksz Sibahle Khwela (Durban University of Technology), uNksz Nolwazi Nene (University of Cape Town), noNksz Scout Fynn (wase-Market Theatre Laboratory). Laba besifazane abane basohlelweni lokuqeqeshwa njengabaphathi e-CCA olwaziwa ngele-Emerging Arts Managers.

Ngokusebenza ngokubambisana neSikole Sezobuciko e-UKZN, le festival izoba nochungechunge lwesithathu lwezinhlelo zababhali kanye nababambe iqhaza oLimini lwesiZulu. Lonke uhlelo lwalomkhosi lwathulwa online ngoLwesithathu, zi-1 kuNdasa.

Uhlelo lwakulonyaka lumeme ababhali abangakashicileli ukuba bathumele izindaba ezimfushane. UNiq Mhlongo, u-Shafinaaz Hassim, uPhindile Dlamini kanye noThemba Qwabe yibo abazoqoka ababhali bezindaba ezimfushane abangama-30 ohlelweni lokubafundisa baphinde babaluleke ngokubhala, lolu hlelo uvuthondaba lwalo lusekushicilelweni kwemibhalo yezindaba ezimfushane oluzofinyelela umvuthwandaba ngokushicilelwa kwemibhalo yezindaba ezimfushane ezimbili zesiNgisi kanye nesiZulu. Izincwadi zizokwethulwa ngoSuku Lokufunda nokubhala mhla ziyisi-8 kuMandulo wonyaka ophezulu.

Uhlelo lomkhosi owaziwa ngele-Time of Writer Festival lwethulwa ngoxhaxha lwabalingani abahlanganisa i-UKZN Press, i-Wits Writing Centre, i-African Centre for the Study of the United States, i-UJ Arts & Culture, i-Dante Foundation, i-Italian Institute of Culture, i-Alliance Francais, i-Business Arts South Africa, i-Imbiza Journal for African Writing, kanye nehhovisi lenxusa lase-Ukraine.

Amagama: ngu-Melissa Mungroo

Isithombe: Sithunyelwe