Umfundi Kamatikuletsheni Ovelele Ukhethe i-UKZN

BY: .

Click here for English version

Umfundi ophumelele kahle kumatikuletsheni eThekwini, uMnu Jaedon Naidu ukhethe ukufunda iSayensi yeDatha e-UKZN emuva kokuphumelela ngamalengiso izifundo eziyisishiyagalolunye e-Eden College, ethola isilinganiso sama-96% isifundo ngasinye waba wuMfundi obaqwaqwade bonke abafundi esikoleni!

Njengoba evele enesiphiwo nothando lwezifundo zezibalo nezesayensi yekhompiyutha, u-Naidu wabona amathuba, ikakhulukazi njengoba ubuchwepheshe buthuthuka, okwenza umsebenzi emkhakheni ogxile ekuhlaziyeni idatha eqhamuka ezinkudleni ezihlukene.

U-Naidu, othweswe imiyezane yokuphumelela ngamalengiso ezifundweni zakhe iminyaka emithathu ilandelana, e-Eden College, waphuma indawo yesithathu ezivivinyweni ze-IEB izikole ezizimele zase-KZN, ukhethe ukuqhuba izifundo e-UKZN ngenxa yamagalelo ayo emhlabeni jikelele, negama layo, nokuthi imnike ithuba lokuqhubeka nokuhlala kubo ngenkathi efunda.

Ngemuva kokwazi ngamathuba eSayensi yeDatha ase-UKZN esesebangeni le-11 ngohlelo i-Dudes in Data olwalusingathwe yi-UKZN School of Mathematics, Statistics and Computer Science (i-SMSCS) esikoleni sakhe, u-Naidu wathola ulwazi ngalo mkhakha olwamsiza ukuthi akhethe izifundo azozenza.

U-Naidu uyafunda, azivocavoce nsuku zonke, afunde iBhayibheli nsuku zonke ukuqinisa ukholo lwakhe lobuKhatholika. Uthokozela imidlalo yangaphansi kwamanzi okukhona kuyona ukuxazulula i-Rubic’s Cube ngaphansi kwamanzi ngemizuzu eyi-18 ungaphefumuli (irekhodi lakhe engaphezulu kwamanzi yimizuzwana eyi-14).

Ungumdlali wopiyano osezingeni eliphezulu onezinga lezine elinamalengiso le-Associated Board of the Royal Schools of Music e-United Kingdom. Esikoleni wathola amabheji esiliva nawegolide opiyano kanti useke wabamba iqhaza kabili ekhonsathini i-The South African Society of Music Teachers ne-Eden Music Soiree.

Unekhono lokwenza umlingo wamakhadi, wathola amagunya e-chess iminyaka eyisikhombisa ilandelana e-Eden. U-Naidu waklonyeliswa ngokuhlonishwa ngebhantshi ngempumelelo yakhe ngezimendlela zegolide, isiliva nethusi, nezitifiketi, nokubamba iqhaza kwi-South African Computer Applications Olympiad (ayinqoba ngonyaka wakhe kamatikuletsheni), i-South African Maths Olympiad, i-South African Programming Olympiad, i-International Physics Olympiad, i-International Mathematics Challenge, i-English Olympiad, i-Talent Search Olympiad, i-Mathematics Contest Kanye ne-Online International Mathematics Competition. Uyilungu elidala le-Institute of IT Professionals (eNingizimu Afrika).

Ngaphezu kwezifundo namasiko esikoleni u-Naidu ubezibandakanya nemisebenzi yokusiza umphakathi wangakubo. Ubeyilungu le-Eden’s Interact Club wathola i-Level Two Eco Badge, wavolontiya ngokufundisa kwi-Association for Mathematics Education of South Africa.

Amagama: ngu-Christine Cuénod

Isithombe: Sithunyelwe