Izingede Zinikwa Isikhathi Esikhethekile Ezingxokweni Zesidlo Se-Time of the Writer Festival

BY: .

Click here for the English version

Ifestiveli i-Time of the Writer yama-25 e-UKZN izohlanganisa ezinye zezingcitha-buchopho ezibhale izincwadi ngokugwamanda amandla ombuso, inkohlakalo, nokuvukela umbuso okungaphumelelanga eNingizimu Afrika.

Uchungechunge lwe-Appropriately billed Dinner Conversations luzoqala ngentatheli yomsakazo uNksz Michelle Constant ozobe ekhuluma noMnuz Jonathan Ancer noMnuz Chris Whitfield ngencwadi yabo ethi Joining the Dots: An unauthorised biography of Pravin Gordhan, equkethe ulwazi olujulile nolumangazayi ngendoda eyaba nesibindi sokumela amandla obumnyama agwamanda amandla ombuso. U-Constant uzophinde akhulume noMnuz Athol Williams (Deep Collussion), uMnuz Themba Maseko (For My Country) uNksz Mosile Mothepu (Uncaptured) noNksz Cynthia Stimpel (Hijackers on Board).

I-Deep Collusion iveza uhlelo lokugwamanda umbuso, nezingxoxo ezenzeka emva kwamahora, nasemajukujukwini. Iveza umzwangedwa walabo abaveza okubi nomphumela wokukhuluma iqiniso ngaphansi kwengcindezi.

I-For My Country kaMaseko ibonisa lokho okudingekayo ukuze umuntu ame ngokweqiniso ezimisweni zakhe. Ngonyaka wezi-2010, uMaseko, ekhulumela uhulumeni, wabizelwa kwa-Gupta eSaxonworld, lapho atshelwa ngu-Ajay Gupta ukuthi athathe ibhajethi yokukhangisa kahulumeni ayinike inkampani yezindaba yalo mndeni. Kwathi uma enqaba ukwenza lokho, uMaseko wasuswa esikhundleni sakhe waphoqwa nokuthi aphume kuhulumeni. Wakhishwa inyumbazane, wakhulunywa kabi waze wathola nokusongelwa ngenxa yesibindi sakhe sokukhuluma aveze ububi.

Ngesikhathi u-Stimpel eqashwa njengoMgcinimafa weSouth African Airways (SAA), wayezitshela ukuthi uthole umsebenzi ayekade ewufisa nokuthi uzohlala iminyaka kuwona. Incwadi yakhe esihloko sithi Hijackers on Board yindaba ngokugwamanda umbuso ekhombisa ukuthi isibindi somuntu oyedwa singashintsha umlando. Nakuba wayazi ukuthi kungabeka engcupheni umsebenzi wakhe nesimo sezimali somndeni wakhe, u-Stimpel akangabazanga ukuhlaba ikhwela eMyangweni Wezezimali, wonga imali yabakhokhintela elinganiselwa ezigidini ezingama-R256.

Kwi-Uncaptured, uMothepu ukhuluma ngokuveza kwakhe okungalungile odabeni lweNegate neTrillian. Ebhekene nengozi yokwethweswa icala nokucwila ezikweletini, ukungasebenzi nokuthathwa njengengozi kwezepolitiki, uMothepu wazizwela ngokwakhe umzwangedwa wokukhuluma uveze okubi okwenziwayo. Uxoxa udaba lwakhe ukuze nabanye abazithola besesimweni esifanayo balandele ezinyathelweni zakhe, bakhulume iqiniso noma kunjani.

Umqondisi we-Centre for Creative Arts uDkt Ismail Mahomed uthe, ‘Zibhekene nokukhashelwa kule ntando yabantu entekenteke, lezi zingede, zibeka impilo nemisebenzi yazo engcupheni ngenxa yokuvikela izwe; zingamaqhawe ethu. Kwi-Time of the Writer, sifisa ukubahlonipha siphinde sibethule nakwizihambeli zethu ukuze zibazi.’

Amagama: Sinoyolo Mahlasela

Izithombe: Zithunyelwe