I-UKZN beyiHlele iKholokhwiyamu Ngokwakha Isimo Sezombusazwe nesezeMvelo Esinekusasa e-Afrika

BY: .

Click here for English version

Izifundo zeSayensi yezoMbusazwe yeqoqo i-International and Public Affairs (i-IPA) eSikoleni seSayensi yezeNhlalo sibambisene ne-Centre for African Governance and Development yase-Durban University of Technology (e-DUT) bebehlele i-KwaZulu-Natal Regional Colloquium ye-South African Association of Political Studies (i-SAAPS).

Isihloko sekholokhwiyamu besithi: Building Sustainable Political and Environmental Landscape in Africa.

Kulo mcimbi bekukhona izifundiswa zakuleli nezaphesheya, abafundi ebeziyethamele ngobuchwepheshe bezokuxhumana nabukhoma. Izingxoxo bezigxile ekubhekeni izindlela zokubhekana nezinselelo zase-Afrika nokuthi singenziwa kanjani isimo sombusazwe nemvelo esinekusasa ezwenikazi.

IDini yezokuFundisa nokuFunda eKolishi le-Humanities, uSolwazi Ruth Hoskins, semukele izivakashi, sabalula ukuthi ikholokhwiyamu yakulo nyako iveze inhloso yokuqhakambisa izihloko ezimqoka ngamazwekazi asathuthuka. Kuzona kukhona inkinga yokuphatha, inxushunxushu kwezombusazwe, imibango yezimpi, ububha, ukungaphephi, ukucekeleka phansi kwemvelo nezinhlekelele zemvelo.

Wengeze ngokuthi: ‘SiyiNyuvesi yase-Afrika yoqobo, iqhaza lethu elisemqoka ukudingida izihloko ezibalulekile njengalezi kanti ayikho enye indlela yokwenza lokhu ngaphandle kwekholokhiyamu enjena.’

Ubonge ikomidi elihlele lo mcimbi uSolwazi Khondlo Mtshali (wase-UKZN), uDkt Lubna Nadvi (wase-UKZN), uMnu Siyabonga Ntombela (wase-UKZN), uDkt Omololu Fagbadebo (wase-DUT), uDkt Zamokuhle Mbandlwa (waseDUT) noSolwazi Ivan Govender (wase-DUT).

UMongameli we-SAAPS uSolwazi Kgothatso Shai wase-University of Limpopo, wethule ingxoxo enohlonze ethi: Rethinking the Status and Legacies of Academy of Science of South Africa (ASSAf) in South Africa’s Contemporary Knowledge Production Regime.

Umongo wenkulumo yakhe bekungukunxusa ukuthi uma isimo semiphakathi yaseNingizimu Afrika sisibi, abantu abasemkhakheni wezemfundo kufanele babhukule, babone izinkinga, bazihlaziye bese bephakamisa izixazululo. Ugxeke osopolitiki ‘ngokuhlukumeza nokuxhaphaza’ izifundiswa, waphonsela inselelo izifundiswa ukuthi zisebenzise amakhono azo okucwaninga nezinto azenzayo ukuthi athathe indawo yawo njengezingcithabuchopho.

Izifundiswa nabafundi abehlukene bethule amaphepha ocwaningo nocwaningo bukhoma nasezinkundleni zokuxhumana ezithangami ezihlukene. Izikhulumi zizwe imibono eyakhayo ngendlela ezikhulume ngayo, zanikwa izitifiketi ngokubamba iqhaza.

Amagama: ngu-Melissa Mungroo noSiyabonga Ntombela

Isithombe: Sithunyelwe